MAADILI NA UTAWALA BORA KATIKA BIASHARA: WATAALAMU KUTOKA NCHI MBALIMBALI ZA AFRIKA WAKUTANA TANZANIA

Mkurugenzi Mtendaji wa Benki ya Absa Tanzania, Obedi Laiser (wa pili kushoto), akishikana mikono na Kamishna wa Sekretarieti ya Maadili, Ofisi ya Rais, Jaji Mstaafu Sivangilwa Sikalalilwa Mwangesi, wakati wa mkutano wa siku mbili kuhusu Maadili ya Biashara wa Absa BEN-Africa 2026, uliodhaminwa na benki hiyo na kuhitimishwa leo katika Shule ya Biashara ya Chuo Kikuu cha Dar es Salaam (UDBS), jijini Dar es Salaam. Mkutano huo uliandaliwa kwa ushirikiano kati ya Benki ya Absa, Mtandao wa BEN-Afrika na Chuo Kikuu cha Dar es Salaam ukiangazia nafasi ya misingi ya maadili katika kukuza biashara endelevu na maendeleo ya kiuchumi barani Afrika. Kutoka kushoto ni Mtaalamu Mwandamizi wa Maadili kutoka Absa Group, Moses Chisadza na Mwenyekiti wa Bodi wa Benki ya Absa Tanzania, Paul Makanza.

Mkurugenzi Mtendaji wa Benki ya Absa Tanzania, Obedi Laiser (Katikati), akishikana mikono na Rais wa Mtandao wa Maadili ya Biashara Afrika wa BEN-Africa, Dk. Bryan Robinson, wakati wa mkutano wa siku mbili kuhusu Maadili ya Biashara wa Absa BEN-Africa 2026, uliodhaminwa na benki hiyo, ukihitimishwa leo katika Shule ya Biashara ya Chuo Kikuu cha Dar es Salaam (UDBS), jijini Dar es Salaam. Mkutano huo uliandaliwa kwa ushirikiano kati ya Benki ya Absa, Mtandao wa BEN-Afrika na Chuo Kikuu cha Dar es Salaam ukiangazia nafasi ya misingi ya maadili katika kukuza biashara endelevu na maendeleo ya kiuchumi barani Afrika. Kushoto ni Mkurugenzi wa Sheria na Udhibiti, Alistides Kashasira.

TANZANIA imepata nafasi muhimu katika mijadala ya kimataifa kuhusu maadili ya biashara, uongozi wenye uwajibikaji na utawala bora, baada ya mkutano wa siku mbili wa Absa BEN-Africa 2026 kuhitimishwa kwa mafanikio katika Shule ya Biashara ya Chuo Kikuu cha Dar es Salaam (UDBS).

Mkutano huo uliowakutanisha wasomi, viongozi wa sekta binafsi, watunga sera, wasimamizi wa sekta mbalimbali, wanafunzi na wataalamu wa masuala ya maadili kutoka nchi mbalimbali za Afrika, Ulaya na Marekani, ulijadili nafasi ya misingi ya kimaadili katika kukuza biashara endelevu na maendeleo ya kiuchumi barani Afrika.

Mkutano huo ulioandaliwa kwa ushirikiano kati ya Benki ya Absa Tanzania, Mtandao wa Maadili ya Biashara Afrika (BEN-Africa) na Chuo Kikuu cha Dar es Salaam, ulikuwa na kaulimbiu isemayo “Mitazamo Tofauti kuhusu Maadili ya Biashara: Misingi ya Kiafrika na Zaidi ya Hapo.”

Akizungumza katika hafla ya ufungaji rasmi wa mkutano huo, Dar es Salaam jana, Kamishna wa Sekretarieti ya Maadili, Ofisi ya Rais, Jaji Mstaafu Sivangilwa Sikalalilwa Mwangesi, aliwataka washiriki kutambua kuwa maadili si kikwazo cha maendeleo, bali ni msingi muhimu wa kuyafikia.

Alisisitiza kuwa ustawi endelevu wa kiuchumi, utawala bora na imani ya wananchi kwa taasisi mbalimbali haviwezi kutenganishwa na uongozi unaozingatia maadili.

Kwa upande wake, Mwenyekiti wa Bodi ya Wakurugenzi ya Absa Bank Tanzania, Paul Makanza katika hotuba yake ya ukaribisho, alisisitiza umuhimu wa kuwakutanisha wadau kutoka vyuo vikuu, sekta binafsi, serikali na asasi za kiraia ili kujadili kwa pamoja changamoto na fursa za kimaadili zinazoweza kuathiri mustakabali wa Afrika.

Katika kipindi chote cha siku mbili, washiriki walijadili masuala mbalimbali yakiwemo mitazamo ya Kiafrika na Magharibi kuhusu maadili ya biashara, uhusiano kati ya faida, madaraka na uwajibikaji wa kampuni, ukuaji endelevu wa uchumi, ujasiriamali unaozingatia maadili, uwajibikaji wa kampuni kwa jamii, maadili katika sekta ya utalii, falsafa ya Ubuntu na matumizi ya Akili Unde (Artificial Intelligence – AI), pamoja na utawala bora katika dunia inayozidi kuunganishwa.

Mijadala hiyo ilihusisha wasomi mashuhuri, viongozi waandamizi wa kampuni, wasimamizi wa sekta na wataalamu wa masuala ya uongozi, ambao walitoa mitazamo na uzoefu wao kuhusu namna ya kuimarisha maadili katika shughuli za biashara na taasisi za umma.

Miongoni mwa hoja muhimu zilizojitokeza ni kwamba Afrika ina falsafa, tamaduni na mifumo yake ya thamani inayoweza kuchangia kwa kiasi kikubwa katika mijadala ya kimataifa kuhusu maadili na uongozi wenye uwajibikaji.

Washiriki walijadili namna falsafa ya Ubuntu, inayosisitiza utu, mshikamano, uwajibikaji wa pamoja na kuthamini maslahi ya wadau wote, inavyoweza kutumika kuimarisha mifumo ya kisasa ya uongozi na uendeshaji wa biashara.

Pia, kulikuwa na mjadala mpana kuhusu uhusiano kati ya kutengeneza faida na kutimiza wajibu kwa jamii, ambapo washiriki walikubaliana kuwa mafanikio ya muda mrefu ya biashara yanahitaji uwiano kati ya malengo ya kibiashara, uwajibikaji wa kijamii, utunzaji wa mazingira na uzingatiaji wa maadili.

Mijadala mingine iligusia umuhimu wa uongozi unaozingatia maadili katika kukabiliana na changamoto zinazojitokeza kutokana na mabadiliko ya teknolojia, matumizi ya Akili Unde, mabadiliko ya tabianchi, ukosefu wa usawa na matarajio yanayobadilika ya wadau mbalimbali.

Akizungumzia mafanikio ya mkutano huo katika hafla ya ufungaji rasmi wa mkutano huo jijini humo leo, Mkurugenzi Mtendaji wa Benki ya Absa Tanzania, Obedi Laiser, alisema ubora wa mijadala iliyofanyika katika siku hizo mbili umeonesha kuwa Afrika ina uwezo wa kitaaluma na kiuongozi wa kushiriki kikamilifu katika kuunda mijadala ya kimataifa kuhusu maadili, utawala bora na biashara zinazowajibika.

“Ubora wa mijadala tuliyoishuhudia katika siku hizi mbili umekuwa wa kipekee. Mkutano huu umeonesha kuwa Afrika ina uwezo wa kitaaluma na kiuongozi unaohitajika katika kuongoza mijadala ya kimataifa kuhusu maadili, utawala bora na biashara zinazowajibika."

“Absa tunaendelea kujizatiti kuunga mkono majukwaa yanayoimarisha uongozi unaozingatia maadili, kwa sababu tunaamini kuwa imani, uadilifu na uwajibikaji ni misingi muhimu ya ukuaji endelevu na ustawi wa pamoja,” alisema Laiser.

Kwa upande wa BEN-Africa, waandaaji wa mkutano huo waliipongeza Tanzania kwa kufanikisha tukio hilo na kusisitiza kuwa ushirikiano kati ya Absa Bank Tanzania, Chuo Kikuu cha Dar es Salaam na wadau wengine ulikuwa sehemu muhimu ya mafanikio hayo.

Rais wa BEN-Africa, Dk. Bryan Robinson, alisema mkutano huo umeendelea kuthibitisha umuhimu wa kuwa na majukwaa yanayowezesha watu wenye mitazamo tofauti kujadili kwa uwazi changamoto na fursa zinazohusiana na maadili katika maendeleo ya bara la Afrika.

Alisema ushiriki mkubwa kutoka nchi mbalimbali za Afrika na nje ya bara hilo unaonesha kuongezeka kwa umuhimu wa mitazamo ya Kiafrika katika mijadala ya kimataifa kuhusu maadili ya biashara.

Nao uongozi wa Shule Kuu ya Biashara ya Chuo Kikuu cha Dar es Salaam (UDBS), chini ya Mkuu wa Chuo hicho, Profesa Omari Khalifa Mbura, ulisisitiza umuhimu wa taasisi za elimu ya juu katika kuandaa viongozi wa baadaye wenye uwezo wa kukabiliana na changamoto tata za kimaadili zinazokabili jamii, biashara na serikali.

Mbali na mijadala rasmi, mkutano huo ulitoa fursa ya kujenga mitandao ya kitaaluma, ushirikiano na kubadilishana maarifa kati ya washiriki kutoka sekta na maeneo mbalimbali.

Baadhi ya washiriki walieleza umuhimu wa kuimarisha uhusiano kati ya tafiti za kitaaluma, sera za umma na utekelezaji wa shughuli za biashara ili kukuza uongozi wenye maadili katika Afrika.

Kwa ujumla, washiriki walikubaliana kuwa mijadala iliyoanzishwa katika mkutano huo haipaswi kuishia kwenye majadiliano pekee, bali inapaswa kutafsiriwa katika vitendo ndani ya taasisi, kampuni, serikali na jamii mbalimbali barani Afrika.

Mkutano wa Absa BEN-Africa 2026 ulihitimishwa kwa washiriki kujizatiti kuendeleza misingi ya uadilifu, uwajibikaji na uongozi unaozingatia maadili kama nguzo muhimu za maendeleo endelevu na ustawi wa muda mrefu wa Afrika.

Mkurugenzi Mtendaji wa Benki ya Absa Tanzania, Obedi Laiser akizungumza wakati wa mkutano wa siku mbili kuhusu Maadili ya Biashara wa Absa BEN-Africa 2026, uliodhaminwa na benki hiyo, ukihitimishwa katika Shule ya Biashara ya Chuo Kikuu cha Dar es Salaam (UDBS), jijini Dar es Salaam, leo. Mkutano huo uliandaliwa kwa ushirikiano kati ya Benki ya Absa, Mtandao wa BEN-Afrika na Chuo Kikuu cha Dar es Salaam ukiangazia nafasi ya misingi ya maadili katika kukuza biashara endelevu na maendeleo ya kiuchumi barani Afrika.

Mkuu wa Shule ya Biashara ya Chuo Kikuu cha Dar es Salaam (UDBS), Prof. Omari Mbura akizungumza wakati wa mkutano wa siku mbili kuhusu Maadili ya Biashara wa Absa BEN-Africa 2026, uliodhaminwa na Benki ya Absa, ukihitimishwa leo katika ukumbi wa mikutano wa UDBS, jijini Dar es Salaam. Mkutano huo uliandaliwa kwa ushirikiano kati ya Benki ya Absa, Mtandao wa BEN-Afrika na Chuo Kikuu cha Dar es Salaam ukiangazia nafasi ya misingi ya maadili katika kukuza biashara endelevu na maendeleo ya kiuchumi barani Afrika.

Mkurugenzi Mtendaji wa Benki ya Absa Tanzania, Obedi Laiser (waliokaa Katikati) akipiga picha ya pamoja na baadhi ya wafanyakazi wa benki wakati wa hitimisho la mkutano wa siku mbili kuhusu Maadili ya Biashara wa Absa BEN-Africa 2026, katika Shule ya Biashara ya Chuo Kikuu cha Dar es Salaam (UDBS), jijini Dar es Salaam, leo.

Read More

PESA ZAKO ZINAKUFANYIA KAZI AU UNAZIFANYIA KAZI?

Fahamu Siri za Usimamizi Bora wa Fedha, Akiba na Ukuaji wa Biashara

Katika maisha ya kila siku, watu wengi hujitahidi kutafuta fedha, kuongeza kipato na kuboresha hali zao za kiuchumi. Hata hivyo, pamoja na juhudi hizo, bado wapo wanaojikuta wakipata kipato lakini wakishindwa kufikia malengo yao ya kifedha. Wengine wanafanya kazi kwa miaka mingi bila kuwa na akiba ya kutosha, huku wafanyabiashara wakipata changamoto ya kutenganisha fedha za biashara na matumizi binafsi.

Hali hii inazua swali muhimu: Je, tunafanya kazi kwa ajili ya fedha pekee, au tunajifunza namna ya kuzifanya fedha zetu zitusaidie kufikia malengo tuliyojiwekea?

Ukweli ni kwamba mafanikio ya kifedha hayategemei tu kiasi cha fedha mtu anachopata, bali pia namna anavyopanga, kutumia, kuweka akiba na kuwekeza fedha hizo.

Katika makala hii, tunaangazia misingi muhimu ya usimamizi wa fedha na namna huduma za kibenki zinavyoweza kuwa sehemu ya safari ya mtu binafsi na mfanyabiashara kuelekea maendeleo ya kiuchumi.

Makala hii inawasilishwa kwa mtazamo wa kitaalamu wa Bi. Lilianfavour Makawa, Team Leader – Sales and Service/Support, Benki ya CRDB, Tawi la Ubungo jijini Dar es Salaam.

1. Kipato Kikubwa Si Dhamana ya Mafanikio ya Kifedha

Moja ya dhana ambazo watu wengi wanapaswa kuzitafakari ni kwamba kuwa na kipato kikubwa hakumaanishi moja kwa moja kuwa na mafanikio ya kifedha.

Mtu anaweza kupata mshahara mkubwa lakini mwisho wa mwezi akawa hana fedha za akiba. Vivyo hivyo, mfanyabiashara anaweza kufanya mauzo makubwa lakini akashindwa kuelewa kama biashara yake inapata faida au inaendelea kula mtaji.

Changamoto kubwa mara nyingi huwa katika usimamizi wa fedha.

Kila mtu anahitaji kuwa na mpango wa mapato na matumizi unaomsaidia kujua fedha anazopata zinaelekezwa wapi. Ni muhimu kutambua tofauti kati ya mahitaji ya lazima, matumizi ya kawaida na matumizi yasiyo ya lazima.

Kuweka malengo ya kifedha, kufuatilia matumizi na kuwa na nidhamu ya fedha ni hatua muhimu katika kujenga msingi imara wa uchumi binafsi.

2. Akiba Si Kwa Wenye Pesa Nyingi Pekee

Kuna dhana potofu kwamba kuweka akiba ni jambo linalowezekana kwa watu wenye mishahara mikubwa au wafanyabiashara wanaopata faida kubwa.

Hata hivyo, akiba huanza na utaratibu na nidhamu, si lazima kuanza na kiasi kikubwa cha fedha.

Mtu anaweza kuanza kwa kutenga sehemu ya kipato chake kila anapopokea mshahara au kupata mapato ya biashara. Jambo la msingi ni kuwa na utaratibu unaoeleweka na kuufuata kwa muda mrefu.

Akiba inaweza kumsaidia mtu katika mambo mbalimbali, ikiwemo:

• Kukabiliana na dharura za kifedha.

• Kutimiza malengo ya muda mfupi na mrefu.

• Kupunguza utegemezi wa mikopo kwa matumizi ya kawaida.

• Kuanzisha au kupanua biashara.

• Kujiandaa kwa mahitaji muhimu ya baadaye.

Kupitia huduma mbalimbali za kibenki, wateja wanaweza kuchagua njia zinazowasaidia kutunza na kusimamia fedha zao kulingana na mahitaji na malengo yao.

3. Mkopo: Fursa ya Maendeleo au Mzigo wa Kifedha?

Mikopo ni mojawapo ya huduma muhimu zinazoweza kumsaidia mtu binafsi au mfanyabiashara kutekeleza mipango yake ya kifedha.

Kwa mfanyabiashara, mkopo unaweza kuwa fursa ya kuongeza bidhaa, kununua vifaa, kupanua eneo la biashara au kuongeza uwezo wa uzalishaji.

Kwa mtu binafsi, mkopo unaweza kusaidia kutimiza mahitaji maalumu kulingana na masharti ya bidhaa ya mkopo husika.

Hata hivyo, kabla ya kukopa, kuna mambo muhimu ya kuzingatia:

Kwanza, kuwa na sababu inayoeleweka ya kukopa. Usikimbilie kuchukua mkopo kwa sababu tu umeona unapatikana. Jiulize utaufanyia nini na utachangiaje katika kuboresha hali yako ya kifedha.

Pili, elewa gharama za mkopo. Fahamu riba, ada, muda wa marejesho na masharti mengine yanayohusika kabla ya kusaini mkataba.

Tatu, pima uwezo wako wa kurejesha. Hakikisha marejesho yanaendana na kipato chako na majukumu mengine ya kifedha.

Nne, tumia mkopo kwa kusudi lililokusudiwa. Ikiwa umekopa kwa ajili ya biashara, ni muhimu kuhakikisha fedha hizo zinatumika katika shughuli zinazohusiana na mpango wa biashara.

Mkopo unaopangwa vizuri unaweza kuwa nyenzo ya maendeleo, lakini mkopo usiozingatia uwezo wa marejesho unaweza kuleta changamoto kubwa za kifedha.

4. Benki Si Mahali pa Kuhifadhi Fedha Pekee!

Watu wengi wanapofikiria kuhusu benki, jambo la kwanza linalowajia akilini ni kuweka na kutoa fedha. Lakini huduma za kibenki zina nafasi kubwa zaidi katika maisha ya kiuchumi ya mtu binafsi na biashara.

Benki zinaweza kutoa huduma mbalimbali zinazosaidia katika:

• Kuhifadhi fedha na kusimamia akaunti.

• Kurahisisha malipo na miamala.

• Kuwezesha upatikanaji wa mikopo kulingana na vigezo husika.

• Kusaidia biashara kusimamia mapato na malipo.

• Kuwezesha matumizi ya huduma za kidigitali.

• Kusaidia wateja kupanga na kusimamia mahitaji yao ya kifedha.

Kwa hiyo, ni muhimu kwa kila mteja kujifunza kuhusu huduma zinazopatikana na kuchagua zile zinazolingana na mahitaji yake.

Uhusiano mzuri kati ya mteja na benki haupaswi kuishia wakati wa kufungua akaunti pekee. Mteja anapaswa kujifunza, kuuliza maswali na kufahamu huduma zinazoweza kumsaidia katika safari yake ya kifedha.

5. Digital Banking: Je, Teknolojia Inarahisisha Maisha Yetu ya Kifedha?

Maendeleo ya teknolojia yamebadilisha kwa kiasi kikubwa namna watu wanavyofanya miamala na kusimamia fedha zao.

Kupitia huduma za kibenki za kidigitali, wateja wanaweza kupata urahisi wa kufanya miamala mbalimbali bila kutegemea kila wakati kufika katika tawi la benki.

Teknolojia hii ina umuhimu mkubwa kwa wafanyabiashara wanaohitaji kufanya malipo, kupokea fedha na kusimamia shughuli zao kwa haraka.

Hata hivyo, pamoja na urahisi huo, usalama wa taarifa na fedha ni jambo lisilopaswa kupuuzwa.

Kila mtumiaji wa huduma za kidigitali anapaswa:

• Kutunza siri za PIN na nywila zake.

• Kutompa mtu mwingine taarifa za siri za akaunti.

• Kuepuka kubonyeza viungo visivyojulikana vinavyotumwa kwa ujumbe.

• Kuthibitisha miamala na taarifa za malipo.

• Kutumia njia rasmi za mawasiliano za benki yake anapohitaji msaada.

Teknolojia inapaswa kuwa nyenzo ya kurahisisha maisha, si chanzo cha kupoteza fedha kutokana na uzembe au udanganyifu.

6. Wafanyabiashara: Tenganisheni Fedha za Biashara na Fedha Binafsi

Changamoto mojawapo inayowakabili wafanyabiashara wadogo na wa kati ni kuchanganya fedha za biashara na matumizi binafsi.

Mfanyabiashara anaweza kufanya mauzo mazuri lakini akashindwa kujua kiasi halisi cha faida kwa sababu fedha zote zinatumika bila utaratibu maalumu.

Ili kuboresha usimamizi wa biashara, ni muhimu:

• Kutenganisha fedha za biashara na matumizi binafsi.

• Kuweka kumbukumbu za mapato na matumizi.

• Kufuatilia madeni ya wateja na madeni ya biashara.

• Kujua gharama za uendeshaji.

• Kutenga fedha kwa ajili ya kukuza biashara.

• Kutumia huduma za kibenki zinazorahisisha ukusanyaji na usimamizi wa fedha.

Mfanyabiashara anayeelewa mtiririko wa fedha katika biashara yake huwa na nafasi nzuri zaidi ya kufanya maamuzi yenye tija.

Biashara yenye mauzo mengi si lazima iwe na faida kubwa. Muhimu ni kuelewa fedha zinazoingia, zinazotoka na kiasi kinachobaki baada ya gharama zote.

7. Unaanzaje Kujenga Maisha Imara Kifedha?

Mafanikio ya kifedha ni safari inayohitaji mipango, uvumilivu na nidhamu. Hakuna kanuni moja inayofaa kila mtu, lakini kuna hatua ambazo zinaweza kumsaidia mtu kuanza.

Hatua ya kwanza: Jiwekee malengo. Amua unataka kufikia nini kifedha ndani ya miezi sita, mwaka mmoja au miaka mitano.

Hatua ya pili: Tengeneza bajeti. Fahamu mapato yako na panga matumizi yako kabla fedha hazijatumika.

Hatua ya tatu: Jenga utamaduni wa kuweka akiba. Anza na kiasi unachoweza kumudu na ongeza kadiri kipato kinavyoruhusu.

Hatua ya nne: Jifunze kuhusu huduma za kifedha. Usitumie huduma za benki kwa mazoea pekee. Fahamu gharama, faida, masharti na namna zinavyoweza kukusaidia.

Hatua ya tano: Fanya maamuzi kabla ya kukopa au kuwekeza. Chunguza fursa, pima hatari na usifanye maamuzi kwa kushawishiwa na matarajio ya kupata faida ya haraka.

Hatua ya sita: Endelea kujifunza. Maarifa ya kifedha yanakusaidia kufanya maamuzi bora zaidi kadiri mahitaji yako yanavyobadilika.

HITIMISHO: NI WAKATI WA KUIBADILISHA NAMNA TUNAVYOICHUKULIA FEDHA

Kujenga maisha imara kifedha hakumaanishi kuwa lazima uwe na fedha nyingi leo. Kunahitaji kujifunza namna bora ya kutumia kile ulicho nacho, kuweka malengo yanayowezekana na kuchukua hatua zinazokuelekeza kwenye mafanikio ya muda mrefu.

Benki na huduma za kifedha zinaweza kuwa sehemu muhimu ya safari hii, lakini mafanikio yanahitaji pia nidhamu binafsi, maarifa na maamuzi sahihi.

Hatimaye, swali si tu kwamba unapata kiasi gani cha fedha, bali ni nini unafanya na fedha unazopata.

Je, pesa zako zinakufanyia kazi au bado unazifanyia kazi bila mpango wa kuzikuza?

---

TUSHIRIKISHE MAONI YAKO!

Tungependa kusikia kutoka kwako:

1. Ni changamoto gani kubwa unayokutana nayo katika kuweka akiba?

2. Unadhani ni jambo gani muhimu zaidi kabla ya mtu kuchukua mkopo wa benki?

3. Kama ungepewa nafasi ya kuuliza mtaalamu wa masuala ya kibenki swali moja, ungependa kujua nini?

Andika maoni au swali lako kwenye sehemu ya maoni. Elimu ya fedha inaanza kwa kuuliza, kujifunza na kuchukua hatua.

KUHUSU MTOA MADA

Bi. Lilianfavour Makawa ni Team Leader – Sales and Service/Support katika Benki ya CRDB, Tawi la Ubungo, Dar es Salaam. Kupitia uzoefu wake katika eneo la mauzo na huduma kwa wateja, anawakilisha mtazamo wa kitaalamu kuhusu umuhimu wa huduma za kibenki katika maisha ya watu binafsi na shughuli za biashara.

Makala hii ni kwa madhumuni ya elimu ya fedha na uelewa wa huduma za kibenki. Kwa maelezo kuhusu bidhaa, huduma, gharama na masharti maalumu, wasiliana na benki husika.

Read More

WATEJA CRDB KUFURAHIA MABORESHO YA INTERNET BANKING, KIKOMO CHA MIAMALA KUPANDA HADI SHS MILIONI 200

DAR ES SALAAM; November 5, 2026 - Benki ya CRDB imeboresha huduma yake ya Internet Banking kwa lengo la kuwapa wateja uwezo zaidi wa kufanya miamala, kusimamia fedha zao na kutekeleza mahitaji mbalimbali ya kibenki kwa urahisi, popote walipo.

Maboresho hayo yameangaziwa wakati wa uzinduzi wa kampeni ya “Internet Banking ni Bora Zaidi – Uwezo Zaidi, Urahisi Zaidi,” inayolenga kuhamasisha matumizi ya huduma za kibenki kwa njia ya kidijitali. Kupitia mfumo huo, wateja wanaweza kupata huduma mbalimbali kwa kutumia simu au kompyuta saa 24 kwa siku, siku saba za wiki.

Kikomo cha miamala chafikia Sh milioni 200

Akizungumza wakati wa uzinduzi wa kampeni hiyo, Mkurugenzi wa Huduma za Benki kwa Wateja Binafsi wa Benki ya CRDB, Bonaventura Paul, amesema moja ya maboresho makubwa yaliyofanyika ni kuongeza kiwango cha juu cha muamala kutoka Sh milioni 50 hadi Sh milioni 200.

Amesema mfumo huo pia sasa unawezesha wateja kufanya hadi malipo 2,000 kwa muamala mmoja, yakiwamo malipo ya mishahara, jambo linalorahisisha shughuli za biashara na taasisi pamoja na kuokoa muda wa wateja.

Huduma mbalimbali katika mfumo mmoja

Aidha, kupitia Internet Banking, wateja wanaweza kuhamisha fedha kwenda benki nyingine kupitia mfumo wa Tanzania Interbank Settlement System (TISS), kufanya malipo ya kimataifa kupitia mfumo wa SWIFT na kutumia sarafu mbalimbali.

Huduma nyingine zinazopatikana kupitia mfumo huo ni pamoja na malipo ya huduma za Serikali kupitia GePG, kodi za Mamlaka ya Mapato Tanzania (TRA), ununuzi wa umeme wa LUKU, malipo ya ving'amuzi na ununuzi wa tiketi za ndege.

Maboresho hayo yanalenga kuwawezesha wateja kukamilisha mahitaji yao mengi ya kifedha kupitia mfumo mmoja wa kidijitali bila kulazimika kutembelea matawi ya benki.

Usalama wa miamala kupewa kipaumbele

Katika kuhakikisha usalama wa fedha na taarifa za wateja, mfumo wa Internet Banking unatumia njia mbalimbali za uthibitishaji wa mtumiaji, zikiwamo jina la mtumiaji, neno la siri na namba ya uthibitisho ya mara moja (OTP) inayotumwa kupitia ujumbe mfupi wa simu (SMS) au kifaa maalumu cha Token.

Hatua hizo zinaongeza ulinzi wakati wa kufanya miamala na kusimamia fedha, kwa wateja binafsi na wa biashara.

Wateja wafurahishwa na maboresho

Baadhi ya wateja waliohudhuria uzinduzi wa kampeni hiyo wameeleza kufurahishwa na maboresho yaliyofanyika, wakisema yatawasaidia kufanya miamala kwa urahisi zaidi, kuokoa muda na kusimamia shughuli zao za kila siku kwa ufanisi.

Kupitia maboresho hayo, Benki ya CRDB inaendelea kuimarisha huduma zake za kidijitali kwa kuweka msisitizo katika urahisi, ufanisi na upatikanaji wa huduma za kifedha kwa wateja wake.

Read More

DIAMOND TRUST BANK YAZINDUA AKAUNTI YA BIASHARA+ KUIMARISHA UJUMUISHAJI WA KIFEDHA NA KUKUZA BIASHARA NCHINI

Kutoka kushoto: Bw. Abhinav Sharma, Mkuu wa Huduma za Benki kwa Wateja Binafsi wa DTB; Bi. Elizabeth Mayengoh, Mkuu wa Matawi; Bw. Ravneet Chowdhury, Afisa Mtendaji Mkuu (CEO); na Bw. Magusa Nhende, Mkuu wa Idara ya Mikopo ya Rejareja na Ubunifu wa Kidijitali, wakati wa uzinduzi wa Akaunti ya Biashara+, huduma iliyoboreshwa inayolenga kuwawezesha wajasiriamali na wafanyabiashara wadogo na wa kati kupitia huduma za benki zenye gharama nafuu, urahisi wa kufanya miamala na upatikanaji wa huduma za kifedha kidijitali.

Dar es Salaam; November 4, 2026 - Benki ya Diamond Trust Bank Tanzania PLC (DTB) imezindua Akaunti ya Biashara+, huduma mpya ya kibenki inayolenga kuwawezesha wajasiriamali na wafanyabiashara wadogo na wa kati (MSMEs) kupitia huduma za kifedha zenye gharama nafuu, urahisi wa kufanya miamala na upatikanaji wa huduma za kibenki kidijitali.

Akaunti hiyo imeundwa kwa kutambua mchango mkubwa wa biashara ndogo na za kati katika kukuza uchumi, kuongeza ajira na kuchochea ujasiriamali nchini. Kupitia huduma hiyo, DTB inalenga kurahisisha usimamizi wa fedha na miamala ya kila siku ya biashara, huku ikipanua upatikanaji wa huduma rasmi za kifedha.

Biashara+ inalenga makundi mbalimbali ya wafanyabiashara, yakiwemo wafanyabiashara wa rejareja, wauzaji na wasambazaji wa bidhaa, wafanyabiashara wa pembejeo za kilimo, wamiliki binafsi wa biashara pamoja na wajasiriamali wengine wanaohitaji huduma za benki zilizo rahisi na zenye gharama nafuu.

Akaunti Kufunguliwa kwa Shs.10,000

Miongoni mwa vivutio vya Akaunti ya Biashara+ ni urahisi wa kuifungua, ambapo mteja anahitaji kiasi cha kuanzia Sh10,000 pekee, huku salio la chini linalotakiwa kubaki kwenye akaunti likiwa ni Sh10,000.

Hatua hiyo inalenga kupunguza vikwazo vya gharama katika upatikanaji wa huduma rasmi za benki, hususan kwa wajasiriamali na wafanyabiashara wenye mitaji midogo.

Akizungumza kuhusu uzinduzi wa akaunti hiyo, Mkuu wa Idara ya Huduma za Benki kwa Wateja Binafsi wa DTB, Bw. Abhinav Sharma, amesema benki hiyo inaendelea kujizatiti kusaidia ukuaji wa biashara na kupanua ujumuishaji wa kifedha nchini.

"Biashara ndogo na za kati ni mhimili muhimu wa uchumi wetu, na ukuaji wake una mchango mkubwa katika maendeleo ya Tanzania. Kupitia Biashara+, tunarahisisha huduma za benki, tunapunguza gharama na kuongeza upatikanaji wa huduma za fedha ili kuwezesha wajasiriamali kutumia muda mwingi zaidi kukuza biashara zao badala ya kuhangaika na miamala ya kila siku," amesema Bw. Sharma.

Manufaa ya Akaunti ya Biashara+

Akaunti ya Biashara+ inakuja na manufaa mbalimbali yanayolenga kurahisisha shughuli za kifedha kwa wafanyabiashara, yakiwemo:

• Usajili wa bure wa huduma ya Internet Banking.
• Kujiunga na huduma ya Lipa Eazy bila malipo.
• Miamala miwili ya bure kwa siku kupitia mfumo wa TIPS.
• Usajili wa bure wa huduma ya benki kwa simu kwa wamiliki binafsi wa biashara.

Huduma hizo zinawawezesha wateja kufanya na kusimamia miamala ya biashara zao kwa urahisi zaidi, pamoja na kutumia mifumo ya kidijitali katika shughuli zao za kila siku.

Kwa upande wa gharama, akaunti hiyo ina ada ya uendeshaji ya Sh2,000 kwa mwezi, huku utoaji wa fedha taslimu kupitia dirishani ukitozwa Sh2,500 kwa kila muamala.

Aidha, miamala ya ziada kupitia mfumo wa TIPS, baada ya kutumia miamala miwili ya bure kwa siku, itatozwa kulingana na viwango vya ada vilivyowekwa na benki.

Masharti ya Kufungua Akaunti

Wateja wanaotaka kufungua Akaunti ya Biashara+ wanatakiwa kuwasilisha nyaraka zifuatazo:

• Kitambulisho cha Taifa (NIDA) au kitambulisho kingine halali.
• Cheti cha Namba ya Utambulisho wa Mlipakodi (TIN).
• Leseni ya biashara, pale inapohitajika.
• Uthibitisho wa eneo biashara ilipo.
• Picha ya ukubwa wa pasipoti.
• Fomu za kufungua akaunti zilizojazwa kikamilifu.

Kwa upande wa kampuni na biashara za ubia, benki inaweza kuhitaji nyaraka za ziada kulingana na aina na muundo wa biashara husika.

Uzinduzi wa Akaunti ya Biashara+ unaashiria hatua nyingine katika juhudi za DTB Tanzania za kupanua ujumuishaji wa kifedha, kuimarisha sekta ya biashara ndogo na za kati na kutoa huduma bunifu za kibenki zinazokidhi mahitaji yanayobadilika ya wafanyabiashara nchini.

Kupitia huduma hiyo, DTB inaendelea kuweka msisitizo katika kuwawezesha wajasiriamali kupata huduma za kifedha zinazowasaidia kusimamia shughuli zao kwa ufanisi na kukuza biashara zao.

Read More

BENKI YA EXIM YAUNGA MKONO UHIFADHI WA MAZINGIRA, YATANGAZA FURSA ZA KIUCHUMI KILOLO, IRINGA

KILOLO, IRINGA, Oktoba 31, 2026 – Benki ya Exim Tanzania imeendelea kuunga mkono juhudi za uhifadhi wa mazingira na maendeleo ya jamii kupitia udhamini wake mkuu wa Mbio za Kitonga Marathon 2026 zilizofanyika wilayani Kilolo, mkoani Iringa.

Mbio hizo zilizokuwa na kaulimbiu ya “Tunza Mazingira, Wekeza Kilolo” zililenga kuhamasisha utunzaji wa mazingira, kuimarisha ushiriki wa jamii katika shughuli za maendeleo na kutangaza fursa mbalimbali za kiuchumi zilizopo wilayani humo, hususan katika sekta za kilimo, utalii na biashara.

Kupitia udhamini huo, Benki ya Exim imeonyesha dhamira yake ya kushirikiana na jamii na wadau mbalimbali katika kuunga mkono mipango inayochangia maendeleo endelevu zaidi ya huduma za kifedha inazotoa.

Akizungumzia ushiriki wa benki hiyo, Mkuu wa Idara ya Masoko na Mawasiliano wa Benki ya Exim Tanzania, Stanley Kafu, alisema udhamini huo unaakisi imani ya benki kwamba mchango wake katika jamii hauishii katika kutoa huduma za kifedha pekee, bali pia unahusisha kuunga mkono mipango inayowaunganisha wadau katika kufanikisha vipaumbele vya maendeleo.

“Mbio za Kitonga zinatoa fursa ya kuitangaza zaidi Kilolo na uwezo wake wa kiuchumi, huku zikihamasisha uwajibikaji wa pamoja katika uhifadhi wa mazingira. Sisi Exim Bank tunaamini kuwa maendeleo endelevu yanahitaji ushirikiano kati ya jamii, wafanyabiashara na wadau wengine."

“Udhamini wetu wa mbio hizi unaakisi dhamira yetu ya kushirikiana na jamii tunazozihudumia na kuchangia juhudi zinazolenga kuleta maendeleo katika maeneo yao,” alisema Kafu.

Udhamini wa Mbio za Kitonga ni sehemu ya jitihada za Benki ya Exim Tanzania kupitia mpango wake wa uwajibikaji kwa jamii unaojulikana kama Exim Cares. Kupitia mpango huo, benki inaunga mkono shughuli mbalimbali zinazolenga kuboresha maisha ya wananchi katika sekta za afya, elimu, uhifadhi wa mazingira, ubunifu na elimu ya masuala ya fedha.

Katika kuendeleza dhamira hiyo, mwaka 2026, ikiwa ni sehemu ya maadhimisho ya miaka 29 tangu kuanzishwa kwake, Benki ya Exim ilifanya shughuli za usafi katika jamii zinazozunguka matawi yake nchini.

Mkoani Iringa, timu ya tawi la benki hiyo ilikabidhi vifaa vya usafi katika Hospitali ya Wilaya ya FLERIMO kwa lengo la kusaidia kuboresha mazingira ya usafi katika kituo hicho cha afya.

Benki ya Exim Tanzania ilifungua tawi lake mkoani Iringa mwaka 2009. Tangu wakati huo, tawi hilo limeendelea kutoa huduma mbalimbali za kifedha kwa watu binafsi, wafanyabiashara, kampuni na taasisi kulingana na mahitaji yao.

Ushiriki wa benki hiyo katika Mbio za Kitonga unaongeza msisitizo katika nafasi ya taasisi za kifedha kushirikiana na jamii na wadau wengine kuunga mkono mipango inayochochea maendeleo ya kiuchumi na kijamii katika maeneo wanayohudumia.

Kupitia tawi lake la Iringa, Benki ya Exim inaendelea kuwakaribisha wakazi na wafanyabiashara wa mkoa huo kutembelea ofisi zake kupata maelezo kuhusu bidhaa na huduma mbalimbali za kifedha pamoja na ushauri unaozingatia mahitaji yao.

Kuhusu Benki ya Exim Tanzania

Benki ya Exim Tanzania ilianza kutoa huduma zake nchini mwaka 1997. Kupitia mtandao wake wa matawi na huduma za kibenki za kidijitali, benki hiyo inawahudumia wateja binafsi, wafanyabiashara, kampuni na taasisi mbalimbali.

Mbali na Tanzania, Benki ya Exim pia inaendesha shughuli zake za kibenki nchini Comoro, Djibouti na Uganda, huku ikiwa na ofisi ya uwakilishi nchini Ethiopia.

Read More

TAASISI YA ELIMU TANZANIA NA CHILDREN IN CROSSFIRE ZA SAINI MoU KUIMARISHA ELIMU YA AWALI NA STADI ZA MSINGI

TAASISI ya Elimu Tanzania (TET) na Shirika lisilo la Kiserikali la Children in Crossfire zimesaini hati ya makubaliano (MoU) kwa lengo la kuimarisha elimu ya awali na elimu ya msingi, hususan katika madarasa ya kwanza na ya pili, kwa kuboresha stadi za kusoma, kuandika na kuhesabu kwa watoto.

Makubaliano hayo yanalenga kuimarisha uandaaji wa vifaa vya kufundishia na kujifunzia, kutoa mafunzo kwa walimu na kuimarisha ufuatiliaji wa utekelezaji wa programu za elimu katika shule, ili kuboresha mazingira ya ufundishaji na ujifunzaji na kuongeza uwezo wa watoto kumudu stadi za msingi.

Hafla ya utiaji saini wa makubaliano hayo imefanyika Oktoba 28, 2026, katika ofisi za TET Jijini Dar es Salaam, ikiwa ni hatua ya kurasimisha ushirikiano ambao umekuwa ukiendelea kwa miaka kadhaa kati ya taasisi hizo katika kuboresha elimu ya watoto.

Akizungumza katika hafla hiyo, Mkurugenzi Mkuu wa TET, Dkt. Aneth Komba, amesema makubaliano hayo yamekuja wakati mwafaka, wakati Serikali ya Awamu ya Sita kupitia Wizara ya Elimu, Sayansi na Teknolojia na taasisi hiyo ikiendelea kutekeleza mpango mkakati wa kuimarisha stadi za kusoma, kuandika na kuhesabu.

Amesema kupitia makubaliano hayo, taasisi hizo zitashirikiana kuimarisha uandaaji wa vifaa vya kufundishia na kujifunzia, miongozo ya walimu pamoja na mafunzo yatakayowawezesha walimu kutekeleza mtaala kwa ufanisi zaidi.

“Tunatarajia kupitia makubaliano haya tutaimarisha uandaaji wa vifaa vya kufundishia na kujifunzia, pamoja na miongozo ya walimu. Pia, tutaimarisha utoaji wa mafunzo ili kuwawezesha walimu wetu kutekeleza mtaala kwa umakini zaidi,” amesema Dkt. Komba.

Amesema ushirikiano huo pia utasaidia kuwajengea walimu uwezo wa kuandaa madarasa yanayochochea ushiriki wa watoto katika mchakato wa kujifunza, badala ya kutegemea zaidi mbinu za kawaida za ufundishaji.

Dkt. Komba, amesema kuwa Children in Crossfire ina uzoefu katika kuandaa vifaa vya kufundishia na kujifunzia vinavyosaidia kujenga mazingira ya darasa shirikishi, yanayomwezesha mtoto kushiriki kikamilifu na kufurahia kujifunza.

“Tunatarajia kushirikiana nao kujenga ujuzi huo na kuusambaza kwa walimu wetu ili waweze kuandaa madarasa yanayomfanya mtoto afurahie kujifunza, apende kukaa darasani, na zaidi ya yote, aweze kumudu stadi za kusoma, kuandika na kuhesabu,” amesema.

Kwa upande wake, Mkurugenzi Mkazi wa Children in Crossfire Tanzania, Craig Ferla, amesema kusainiwa kwa makubaliano hayo ni hatua muhimu katika kuimarisha ushirikiano uliokuwepo kwa miaka kadhaa kati ya shirika hilo na TET katika kutekeleza shughuli za kuboresha elimu.

Amesema shirika hilo limekuwa likishirikiana na TET katika uandaaji wa vifaa vya kufundishia na kujifunzia, mafunzo kwa walimu na ufuatiliaji wa utekelezaji wa programu za elimu ya awali shuleni.

“Leo ni siku muhimu kwa shirika letu kwa sababu tumeingia katika makubaliano rasmi na Taasisi ya Elimu Tanzania. Tumekuwa tukishirikiana kwa miaka kadhaa katika kuandaa vifaa vya kufundishia, kutoa mafunzo kwa walimu na kufuatilia utekelezaji wa programu za elimu ya awali,” amesema Ferla.

Ameeleza kuwa kufanikiwa kwa ushirikiano huo kutawezesha shirika hilo kuendelea kutekeleza miradi yake kupitia mifumo na rasilimali zilizopo katika sekta ya elimu nchini, kwa kuzingatia mazingira na muktadha wa elimu Tanzania.

Ferla amesema elimu ya awali na madarasa ya kwanza na ya pili yana umuhimu mkubwa katika safari ya elimu ya mtoto, kwa kuwa ni hatua ambazo hujenga msingi wa utayari wa shule na uwezo wa kumudu stadi muhimu za kujifunza.

Amesisitiza kuwa uwekezaji katika hatua hizo za mwanzo za elimu utasaidia watoto wengi zaidi kupata msingi imara wa kusoma, kuandika na kuhesabu, jambo litakalowawezesha kufanya vizuri zaidi wanapoendelea na elimu ya msingi na hatua nyingine za masomo.

Amesema kuimarishwa kwa msingi huo kutachangia pia kujenga rasilimali watu yenye maarifa na ujuzi unaohitajika katika kukuza uchumi wa Tanzania na kufikia malengo ya maendeleo ya taifa.

Kufikiwa kwa makubaliano hayo kunatarajiwa kuimarisha uratibu kati ya TET na Children in Crossfire, kupanua uwezo wa walimu katika kutumia mbinu bora za ufundishaji na kujenga mazingira yanayowawezesha watoto kupata stadi za msingi katika hatua za mwanzo za elimu yelimu yao.

Read More

BENKI YA ABSA TANZANIA NA CHUO KIKUU CHA DAR ES SAAAM WAANDAA MKUTANO WA BEN-AFRICA WA MAADILI YA BIASHARA AFRIKA

Mkurugenzi wa Masoko na Mahusiano wa Benki ya Absa Tanzania, Aron Luhanga (katikati), akizungumza na waandishi wa habari jijini Dar es Salaam leo, kuhusu mkutano wa BEN-Africa 2026 unaohusu Maadili ya Biashara Afrika unaotarajiwa kufanyika Novemba 5 na 6 mwaka huu jijini Dar es Salaam. Kushoto ni Mkurugenzi wa Masoko na Kaimu Mkuu wa Shule ya Biashara ya Chuo Kikuu cha Dar es Salaam, Dk. Robert Suphian na kulia ni Mkurugenzi wa Sheria na Udhibiti wa Benki ya Absa Tanzania, Alistides Kashasira.

Tanzania itakuwa mwenyeji wa Mkutano wa mwaka 2026 wa Mtandao wa Maadili ya Biashara Afrika (BEN-Africa), utakaofanyika Novemba 5 na 6 katika Shule ya Biashara ya Chuo Kikuu cha Dar es Salaam (UDBS), ukiwaleta pamoja viongozi wa biashara, watunga sera, wasomi na wadau mbalimbali kujadili uongozi wenye maadili, utawala bora na mwenendo unaowajibika katika biashara.

Mkutano huo unaandaliwa kwa ushirikiano kati ya Benki ya Absa Tanzania, BEN-Africa na Chuo Kikuu cha Dar es Salaam, ukiwa na kaulimbiu isemayo “Mitazamo Tofauti kuhusu Maadili ya Biashara: Mtazamo wa Kiafrika na Zaidi ya Hapo.”

Lengo la mkutano huo ni kuchunguza namna uongozi wenye maadili unavyoweza kuchangia maendeleo endelevu, kuimarisha uwajibikaji katika shughuli za biashara na kukuza ustawi wa muda mrefu wa bara la Afrika.

BEN-Africa, ambayo ni kifupi cha Business Ethics Network of Africa, ilianzishwa mwaka 1999 na imekua kuwa mtandao muhimu wa bara la Afrika unaowakutanisha wasomi, viongozi wa biashara, watunga sera na asasi za kiraia kujadili changamoto mbalimbali za kimaadili zinazolikabili bara hilo.

Akizungumza kwa niaba ya Benki ya Absa Tanzania, katika mkutano na waandishi wa habari jijini Dar es Salaam leo, Mkurugenzi wa Sheria na Udhibiti, Alistides Kashasira, alisema maadili ni msingi muhimu wa kujenga taasisi endelevu, masoko yanayoaminika na jamii zenye ustawi.

“Maadili si suala la kutimiza tu matakwa ya uzingatiaji wa sheria na kanuni; bali ndiyo msingi unaojenga taasisi endelevu, masoko yanayoaminika na jamii zenye ustawi. Kama benki inayojivunia kuwa ya Kiafrika, Absa inaamini kuwa uongozi wenye maadili na utawala imara ni vichocheo muhimu vya ukuaji wa uchumi jumuishi,” alisema Kashasira.

Aliongeza kuwa ushirikiano wa benki hiyo na BEN-Africa unaakisi dhamira yake ya kuendeleza uadilifu, uwajibikaji na mwenendo unaowajibika katika shughuli za biashara barani Afrika.

Ushirikiano huo pia unaendana na dhamira ya Absa Group ya “Kuiwezesha Afrika ya Kesho, pamoja… hatua moja baada ya nyingine”, pamoja na juhudi zake za muda mrefu za kuimarisha utawala wenye maadili, uwazi na biashara jumuishi.

Kupitia udhamini wake wa BEN-Africa, Absa inalenga kuwezesha majadiliano yenye tija na ushirikiano katika kutafuta suluhisho yatakayosaidia kuimarisha utawala bora na maadili ya biashara barani Afrika.

Kwa upande wake, Mkurugenzi wa Masoko na Mahusiano wa Benki ya Absa Tanzania, Aron Luhanga, alisema benki hiyo inajivunia kushirikiana na wadau kuileta BEN-Africa nchini Tanzania.

Alisema mkutano huo una maana kubwa zaidi ya udhamini, kwani unaakisi misingi ya benki hiyo na imani yake kwamba mwenendo wenye maadili, uongozi unaowajibika na uaminifu wa wadau ni nguzo muhimu za ukuaji endelevu.

Luhanga alisema mkutano huo pia utaipa Tanzania fursa ya kujitambulisha kama kitovu cha mijadala ya kitaalamu na mawazo bunifu, huku ukichochea majadiliano yatakayosaidia kuunda mustakabali wa biashara yenye maadili barani Afrika.

Programu ya mkutano huo itajumuisha hotuba kuu, mijadala ya majopo na majadiliano ya kitaalamu kuhusu masuala mbalimbali, yakiwemo mitazamo ya Kiafrika na Kimagharibi kuhusu maadili ya biashara, faida na mamlaka katika biashara, ukuaji endelevu wa uchumi na uongozi wenye maadili.

Mada nyingine zitakazojadiliwa ni ujasiriamali unaozingatia maadili, falsafa ya Kiafrika ya Ubuntu na akili unde (Artificial Intelligence — AI), utalii, utawala bora na mwenendo unaowajibika katika biashara, pamoja na wajibu wa kampuni kwa jamii na athari za shughuli zake kwa maendeleo ya kijamii.

Chuo Kikuu cha Dar es Salaam, ambacho ni miongoni mwa taasisi zinazoongoza katika elimu ya juu na utafiti barani Afrika, kitakuwa mwenyeji wa mkutano huo na kuchangia mijadala ya kitaaluma kuhusu maadili, uongozi na utawala bora.

Akizungumza kwa niaba ya chuo hicho, Dkt. Robert Suphian, Mkuu wa Idara ya Masoko na Kaimu Mkuu wa Shule ya Biashara ya Chuo Kikuu cha Dar es Salaam, alisema vyuo vikuu vina wajibu wa kuandaa si wahitimu wenye ujuzi pekee, bali pia viongozi wenye maadili na uwezo wa kukabiliana na changamoto kubwa zinazoikabili jamii.

Alisema chuo hicho kina heshima ya kuwa mwenyeji wa mkutano huo muhimu na kuchangia juhudi za kuendeleza maadili, utawala bora na uongozi unaowajibika barani Afrika.

Mkutano wa mwaka 2026 utakuwa mara ya tatu kwa Tanzania kuwa mwenyeji wa mkutano wa mwaka wa BEN-Africa katika historia ya mtandao huo ya miaka 25, hatua inayoonesha nafasi inayoongezeka ya nchi katika mijadala ya kikanda kuhusu utawala bora, uongozi na maadili ya biashara.

Mkutano huo unatarajiwa kuvutia washiriki kutoka nchi mbalimbali za Afrika, wakiwemo viongozi wa serikali, watendaji wakuu wa kampuni, wadhibiti, wasomi, watafiti, wanafunzi na wataalamu wa maendeleo.

BEN-Africa, Benki ya Absa Tanzania na Chuo Kikuu cha Dar es Salaam vimewaalika wadau wote wanaojitolea kujenga Afrika yenye maadili, maendeleo endelevu na ustawi kushiriki katika mkutano huo.

Mkurugenzi wa Masoko na Mahusiano wa Benki ya Absa Tanzania, Aron Luhanga (katikati), akiwa na Mkurugenzi wa Masoko na Kaimu Mkuu wa Shule ya Biashara ya Chuo Kikuu cha Dar es Salaam, Dk. Robert Suphian (kulia), jijini Dar es Salaam leo, kuhusu mkutano wa BEN-Africa 2026 unaohusu Maadili ya Biashara Afrika unaotarajiwa kufanyika Novemba 5 na 6 mwaka huu jijini Dar es Salaam. Wengine ni baadhi ya wafanyakazi kutoka Absa.

Mkurugenzi wa Masoko na Mahusiano wa Benki ya Absa Tanzania, Aron Luhanga (wa tano kushoto), akipiga picha ya pamoja na Mkurugenzi wa Masoko na Kaimu Mkuu wa Shule ya Biashara ya Chuo Kikuu cha Dar es Salaam, Dk. Robert Suphian (kulia), jijini Dar es Salaam leo, kuhusu mkutano wa BEN-Africa 2026 unaohusu Maadili ya Biashara Afrika unaotarajiwa kufanyika Novemba 5 na 6 mwaka huu jijini Dar es Salaam. Wengine ni baadhi ya wafanyakazi kutoka Absa na wa UDSM.

Read More

AIRTEL YASOGEZA SULUHISHO ZA KIDIJITALI KWA WAFANYABIASHARA KATIKA MAONESHO YA TANO YA SIDO KAHAMA

Waziri wa Viwanda na Biashara, Judith Kapinga (wa pili kulia), akikabidhi cheti cha ushiriki kwa Mkurugenzi wa Airtel Tanzania anayesimamia Biashara, Joseph Vipond (kushoto), kufuatia udhamini wa kampuni hiyo katika Maonesho ya Tano ya Kitaifa ya SIDO yanayofanyika Kahama, Mkoani Shinyanga. Maonesho hayo yanalenga kukuza biashara na kuhamasisha matumizi ya suluhisho za kidijitali kwa biashara ndogo na za kati (SMEs). Wa nne kutoka kulia ni Katibu Mkuu wa Wizara ya Viwanda na Biashara, Waziri Salum, akiwa pamoja na viongozi wengine wa Serikali na Airtel.

Kahama, Shinyanga; Oktoba 24, 2026 - Airtel Tanzania, kupitia kitengo chake cha huduma kwa biashara cha Airtel Business, imewasogezea wafanyabiashara suluhisho za kidijitali na mawasiliano zinazolenga kuboresha ufanisi wa shughuli zao, kupunguza gharama za uendeshaji na kukuza biashara.

Suluhisho hizo zinaangaziwa katika Maonesho ya Tano ya Kitaifa ya Shirika la Kuhudumia Viwanda Vidogo (SIDO), yanayofanyika katika Viwanja vya Magufuli, Manispaa ya Kahama, Mkoa wa Shinyanga, kuanzia Oktoba 21 hadi 30, 2026.

Maonesho hayo ya siku 10 yameandaliwa na Wizara ya Viwanda na Biashara kwa kushirikiana na Ofisi ya Mkuu wa Mkoa wa Shinyanga, yakishirikisha zaidi ya wajasiriamali na wafanyabiashara wadogo 600 kutoka Tanzania Bara na Zanzibar.

Akizungumza wakati wa ufunguzi rasmi wa maonesho hayo, Waziri wa Viwanda na Biashara, Judith Kapinga, alisema Serikali inaendelea na juhudi za kupanua upatikanaji wa mikopo kwa wajasiriamali ili kuwawezesha kukuza biashara zao, kuongeza uzalishaji na kutengeneza ajira.

Alisisitiza umuhimu wa ushirikiano kati ya taasisi za fedha, sekta binafsi na SIDO katika kubuni huduma zinazokidhi mahitaji ya wajasiriamali, hususan katika upatikanaji wa mitaji.

“Lengo la Serikali hii ya Awamu ya Sita ni kuhakikisha huduma hizi zinaendelea kuwafikia wajasiriamali wengi zaidi, hasa wale wenye uwezo wa kuzalisha na kukuza biashara lakini wanaokabiliwa na vikwazo vya kupata fedha za mitaji. Nitumie pia fursa hii kuzihimiza taasisi za fedha kuendelea kushirikiana na Serikali kupitia SIDO katika kubuni huduma zinazozingatia mahitaji ya wajasiriamali wadogo na wa kati ili kuendeleza sekta hii nchini,” alisema Kapinga.

Aidha, Waziri huyo aliiitaka SIDO kuelekeza mikopo zaidi katika shughuli za uzalishaji na uongezaji thamani wa bidhaa ili kuimarisha viwanda vya ndani na kuongeza fursa za ajira.

Kwa upande wake, Mkurugenzi wa Airtel Business, Joseph Vipond, alisema ushiriki wa Airtel Tanzania katika maonesho hayo unaonesha dhamira ya kampuni hiyo ya kuwawezesha wafanyabiashara kupata suluhisho za kidijitali zinazokidhi mahitaji yao na kusaidia ukuaji wa biashara.

“Biashara ndogo na za kati ni nguzo muhimu ya uchumi wa Tanzania. Ushiriki wetu katika Maonesho ya Kitaifa ya SIDO unaonesha dhamira yetu ya kuwasogezea wafanyabiashara suluhisho za kidijitali zilizo nafuu, za kuaminika na zinazokidhi mahitaji yao."

“Kupitia huduma kama Airtel Chapakazi na SME Bundles, tunasaidia biashara kudhibiti gharama za mawasiliano, kuongeza ufanisi wa shughuli zao na kuzingatia kukuza biashara na kuwahudumia wateja,” alisema Vipond.

Suluhisho za kidijitali zinazolenga kukuza biashara

Katika maonesho hayo, Airtel Business inaangazia suluhisho mbalimbali zilizoundwa kusaidia biashara kuimarisha mawasiliano, kurahisisha malipo na kuboresha upatikanaji wa intaneti.

Airtel Chapakazi

Huduma hii inatoa vifurushi vya data, dakika za maongezi na SMS kwa gharama nafuu, mahsusi kwa wajasiriamali na biashara ndogo na za kati (SMEs). Vifurushi hivyo vinawawezesha wafanyakazi wanaotekeleza majukumu nje ya ofisi kuwasiliana kwa urahisi na wateja pamoja na wenzao.

Airtel SME na Corporate Yatosha

Vifurushi hivi vinatoa suluhisho za mawasiliano kupitia mifumo ya malipo ya baada ya matumizi (postpaid) na mipango mseto (hybrid). Huduma hizo zinajumuisha uwezo wa kugawana vifurushi vya data miongoni mwa watumiaji (data pooling) na mfumo wa mawasiliano ya ndani ya kikundi (Closed User Group – CUG), unaowawezesha wafanyakazi kupigiana simu bila kikomo na bila gharama za ziada kwa mujibu wa masharti ya huduma.

Suluhisho hizi zinalenga kusaidia kampuni kudhibiti gharama za uendeshaji na kurahisisha mawasiliano miongoni mwa wafanyakazi.

Airtel SmartConnect na Pocket Wi-Fi

Airtel pia inaangazia suluhisho za intaneti kupitia teknolojia za 4G na 5G, zinazosaidia biashara kupata huduma za intaneti ofisini na wanapokuwa safarini. Baadhi ya vifaa vina betri za akiba zinazoweza kusaidia kuendelea kutumia intaneti wakati umeme unapokatika, kutegemea uwezo wa kifaa na upatikanaji wa mtandao.

Airtel Money Enterprise Services

Huduma hii inawezesha biashara kufanya miamala ya kidijitali kwa urahisi na usalama, ikiwemo malipo ya mishahara na ukusanyaji wa malipo kutoka kwa wateja kupitia namba za Till na misimbo ya QR.

Kupitia ushiriki wake katika Maonesho ya Tano ya Kitaifa ya SIDO, Airtel Tanzania inaendelea kuonesha dhamira yake ya kuchangia ukuaji wa uchumi kwa kuwawezesha wajasiriamali na biashara ndogo na za kati kutumia teknolojia kuboresha shughuli zao.

Suluhisho hizo zinatarajiwa kusaidia wafanyabiashara kuimarisha mawasiliano na wateja, kurahisisha shughuli za kila siku, kuongeza ushindani sokoni na kutumia fursa zinazotokana na uchumi wa kidijitali.

Read More

BENKI YA EXIM TANZANIA YATOA ELIMU NA HUDUMA ZA UCHUNGUZI WA SARATANI YA MATITI BILA MALIPO

Meneja Mkuu wa Masoko na Mawasiliano wa Benki ya Exim Tanzania, Kauthar D’souza, akiwa katika hatua mojawapo ya uchunguzi wa saratani ya matiti wakati wa zoezi la uhamasishaji lililoandaliwa na benki hiyo kupitia programu ya Exim Cares, kwa kushirikiana na wataalamu kutoka Taasisi ya Saratani Ocean Road, jijini Dar es Salaam, tarehe 23 Oktoba 2026. Zoezi hilo liliwapa wafanyakazi wa benki hiyo na wanajamii wanaoizunguka fursa ya kupata elimu na huduma za uchunguzi bila malipo, ikiwa ni sehemu ya maadhimisho ya Mwezi wa Uhamasishaji kuhusu Saratani ya Matiti, unaoadhimishwa kila Oktoba kwa lengo la kuhamasisha utambuzi wa mapema na matumizi ya taarifa sahihi za afya.

Dar es Salaam - Oktoba 23, 2026: Benki ya Exim Tanzania, kupitia programu yake ya uwajibikaji kwa jamii ya Exim Cares, imetoa elimu na huduma za uchunguzi wa saratani ya matiti bila malipo kwa wafanyakazi wake na wanajamii wanaoizunguka, katika makao makuu ya benki hiyo jijini Dar es Salaam.

Zoezi hilo lililofanyika Oktoba 23, 2026, ni sehemu ya maadhimisho ya Mwezi wa Uhamasishaji kuhusu Saratani ya Matiti, unaoadhimishwa kila Oktoba kwa lengo la kuongeza uelewa kuhusu ugonjwa huo na kuhimiza utambuzi wa mapema.

Kupitia wataalamu kutoka Taasisi ya Saratani Ocean Road, washiriki walipata elimu kuhusu dalili na mabadiliko yanayoweza kuashiria saratani ya matiti, umuhimu wa tathmini ya kitabibu na hatua za kuchukua wanapobaini mabadiliko yasiyo ya kawaida. Juhudi hizo pia zililenga kupunguza hofu na dhana potofu zinazoweza kuchelewesha upatikanaji wa huduma za afya.

Kwa mwaka 2026, Mwezi wa Uhamasishaji kuhusu Saratani ya Matiti unaambatana na kaulimbiu “Kila simulizi ni ya kipekee, kila hatua ina thamani,” inayosisitiza umuhimu wa taarifa sahihi, huduma zinazofaa na msaada kwa watu walioathiriwa na ugonjwa huo.

Hatua hiyo inakuja wakati saratani ya matiti ikiendelea kuwa changamoto ya afya duniani na nchini Tanzania. Kwa mujibu wa Shirika la Kimataifa la Utafiti wa Saratani (IARC), makadirio ya mwaka 2024 yanaonesha kuwa kulikuwa na visa vipya takribani milioni 2.43 vya saratani ya matiti duniani. Nchini Tanzania, wanawake takribani 3,024 walikadiriwa kugundulika na ugonjwa huo, huku vifo 1,492 vikikadiriwa kutokana na saratani ya matiti katika mwaka huo.

Aidha, kwa mujibu wa Shirika la Afya Duniani (WHO), kiwango cha kuishi kwa angalau miaka mitano baada ya kugundulika na saratani ya matiti kilikadiriwa kuwa asilimia 77.8 duniani, ikilinganishwa na asilimia 39.1 katika Kanda ya Afrika ya WHO, kwa wanawake waliogundulika kati ya mwaka 2017 na 2021.

Takwimu hizo zinasisitiza umuhimu wa utambuzi wa mapema na upatikanaji wa huduma za uchunguzi na matibabu kwa wakati ili kuboresha matokeo ya matibabu na kupunguza vifo.

Akizungumzia ushiriki wa benki hiyo katika juhudi hizo, Meneja Mkuu wa Masoko na Mawasiliano wa Benki ya Exim Tanzania, Kauthar D’souza, alisema afya na ustawi wa wafanyakazi pamoja na jamii kwa ujumla ni sehemu muhimu ya mchango wa benki kupitia programu ya Exim Cares.

“Afya ya jamii inahitaji ushirikiano na hatua za pamoja. Kupitia Exim Cares, tunaunga mkono juhudi zinazowasaidia wafanyakazi wetu na jamii kupata taarifa sahihi kuhusu afya na kuelewa umuhimu wa kuchukua hatua kwa wakati. Tunaamini kuwa kuongeza uelewa kuhusu saratani ya matiti ni sehemu muhimu ya kuhimiza utunzaji wa afya na upatikanaji wa huduma zinazofaa,” alisema D’souza.

Aliongeza kuwa, kwa mujibu wa WHO, takribani asilimia 80 ya saratani ya matiti hutokea kwa wanawake wasio na vihatarishi maalumu vinavyojulikana, isipokuwa kuwa mwanamke na kuongezeka kwa umri.

“Hivyo, kutokuwa na historia ya saratani ya matiti katika familia hakumaanishi kuwa mtu hawezi kupata ugonjwa huo. Jambo hili linasisitiza umuhimu wa kufahamu mabadiliko ya mwili na kutafuta ushauri wa kitaalamu inapohitajika,” aliongeza.

Kwa upande wake, Daktari Maguha Stephano, mwakilishi wa Taasisi ya Saratani Ocean Road, alisema kuelimisha jamii na kuhamasisha watu kutafuta huduma za afya mapema ni sehemu muhimu ya juhudi za kukabiliana na saratani ya matiti.

“Ni muhimu jamii kupata taarifa sahihi kuhusu saratani ya matiti na kutoruhusu hofu au dhana potofu kuwazuia kutafuta huduma za afya. Watu wanapaswa kufahamu mabadiliko ya miili yao na kutafuta ushauri wa kitaalamu wanapobaini mabadiliko yasiyo ya kawaida, kama vile uvimbe kwenye titi au kwapani, au mabadiliko kwenye ngozi ya titi au chuchu. Tathmini ya kitabibu kwa wakati husaidia kuharakisha utambuzi na hatua zinazofaa,” alisema.

Exim Cares ni programu ya uwajibikaji kwa jamii ya Benki ya Exim Tanzania inayolenga kuboresha maisha kupitia juhudi katika sekta za afya, elimu, mazingira, ubunifu na elimu ya fedha.

Katika sekta ya afya, benki hiyo imekuwa ikiunga mkono kampeni za uchangiaji damu kwa kushirikiana na Huduma ya Taifa ya Damu Salama (NBTS), kuimarisha huduma za afya hospitalini kupitia msaada wa vifaa tiba na kuboresha mazingira kwa ajili ya wagonjwa wenye changamoto za afya ya akili.

Juhudi hizo zinaonesha dhamira ya benki katika kuendeleza afya na ustawi wa jamii.

Benki ya Exim Tanzania imewahimiza wafanyakazi wake na jamii kwa ujumla kufanya utunzaji wa afya kuwa sehemu ya maisha ya kila siku, kupata ushauri wa kitaalamu kuhusu uchunguzi unaofaa na kutochelewa kutafuta huduma za afya wanapobaini mabadiliko yasiyo ya kawaida.

Kuhusu Benki ya Exim Tanzania

Benki ya Exim Tanzania ni taasisi ya kifedha iliyoanzishwa nchini Tanzania mwaka 1997. Benki hiyo hutoa huduma mbalimbali za kifedha kwa watu binafsi, wafanyabiashara, kampuni na taasisi kupitia mtandao wake wa matawi na njia za kidijitali.

Benki hiyo pia inaendesha shughuli zake nchini Comoro, Djibouti na Uganda, pamoja na kuwa na ofisi ya uwakilishi nchini Ethiopia, ikiwa ni sehemu ya upanuzi wa huduma zake katika masoko ya kikanda.

Read More

BENKI YA ABSA YAZINDUA KAMPENI YA “MKWANJA KILAINI NA KADI YA ABSA” KUHAMASISHA MATUMIZI YA HUDUMA ZA KIBENKI KWA NJIA ZA KIDIGITALI

Mkuu wa Mikakati na Bidhaa za Wateja Binafsi wa Benki ya Absa Tanzania, Bw. Heristraton Genesis (kushoto), akizungumza jijini Dar es Saaam leo, wakati wa uzinduzi rasmi wa Kampeni ya ‘Mkwanja Kiulaini na Kadi ya Absa’ yenye lengo la kuhamasisha matumizi ya huduma za kibenki kwa njia za kidigitali. Absa imetenga zawadi za pesa taslimu kiasi cha shs milioni 60 katika kampeni hiyo itakayodumu kwa muda wa miezi mitatu. Kulia ni Meneja Bidhaa za Kadi, Bi. Erica Mwaipopo.

Benki ya Absa Tanzania imezindua kampeni iliyopewa jina la “Mkwanja Kilaini na Kadi ya Absa”, ikiwa na na lengo la kuhamasisha matumizi ya huduma za kibenki kwa njia za kidigitali huku ikitenga jumla ya Shilingi milioni 60 kama zawadi za fedha taslimu kwa wateja wanaotumia kadi zake za malipo na mikopo katika miamala yao ya kila siku.

Kupitia kampeni hiyo itakayodumu kwa muda wa miezi mitatu itashuhudia washindi watatu wa kila mwezi wakijishinda pesa taslimu ambapo mshindi wa kwanza Shilingi milioni 5, mshindi wa pili Shilingi milioni 3 na mshindi wa tatu Shilingi milioni 2.

Jumla ya washindi tisa watapatikana katika kampeni hiyo ambapo zawadi kuu ya Shilingi milioni 30 itatolewa kwa mshindi mmoja mwishoni mwa kampeni, na kufanya jumla ya zawadi zote kufikia Shilingi milioni 60.

Akizungumza jijini Dar es Salaam leo wakati wa uzinduzi huo kwa niaba ya Mkurugenzi wa Wateja Binafsi, Mkuu Mikakati na Bidhaa za Wateja Binafsi wa benki hiyo, Heristraton Genesis, alisema kampeni hiyo inaakisi dhamira ya benki ya kuwazawadia wateja wake huku ikihamasisha matumizi ya huduma za kibenki zilizo salama na rahisi zaidi.

“Katika Absa, tunaendelea kutafuta njia bunifu za kuwazawadia wateja wetu huku tukihamasisha tabia bora za kifedha. Kupitia kampeni ya ‘Mkwanja Kilaini, na Kadi ya Absa’, wateja wanachotakiwa kufanya ni kutumia kadi zao za Absa za malipo au mikopo katika manunuzi na miamala yao ya kila siku ili kupata nafasi ya kushinda zawadi za fedha taslimu zinazoweza kuleta mabadiliko makubwa katika maisha yao,” alisema.

Genesis aliongeza kuwa kadiri wateja wanavyofanya miamala mingi zaidi inayokidhi vigezo vya kampeni hiyo, ndivyo wanavyoongeza nafasi zao za kushiriki katika droo za bahati nasibu na kushinda zawadi.

Alibainisha kuwa malipo kwa kutumia kadi yana faida mbalimbali, zikiwemo urahisi wa matumizi, usalama ulioimarishwa, kukubalika katika maeneo mbalimbali duniani na kurahisisha upatikanaji wa huduma za biashara za kidijitali. Alisema faida hizo zinaifanya njia hiyo kuwa chaguo linalofaa zaidi katika uchumi wa kisasa unaozidi kutegemea teknolojia.

Kampeni hiyo inawahusu wateja waliopo na wapya wa Absa wenye umri wa miaka 18 na kuendelea ambao wanamiliki kadi za benki za malipo au mikopo za Absa. Wateja wanapaswa kufanya miamala inayokidhi vigezo vya kampeni kwa kutumia kadi zao na njia za huduma za kibenki za kidijitali zinazostahili ndani ya kipindi cha kampeni.

Washindi watapatikana kupitia droo za bahati nasibu zitakazofanyika kila mwezi chini ya usimamizi wa Bodi ya Michezo ya Kubahatisha Tanzania.

Kwa upande wake, Meneja Huduma za Jamii wa Benki ya Absa Tanzania, Abigail Lukuvi, alisema kampeni hiyo inasisitiza dhamira ya benki hiyo ya kuwaweka wateja katika kiini cha shughuli zake zote.

Alisema mpango huo unafuatia Wiki ya Huduma kwa Wateja, lakini unaonyesha kuwa juhudi za benki hiyo za kutambua na kuthamini wateja wake zinaendelea hata baada ya maadhimisho hayo ya kila mwaka.

“Wateja wetu ndio kiini cha biashara yetu, na kampeni ya ‘Mkwanja Kilaini, na Kadi ya Absa’ ni fursa nyingine kwetu ya kuwatambua, kuwazawadia na kuthamini imani wanayoendelea kutupatia kila siku,” alisema Abigail.

Aliongeza kuwa Absa imekuwa ikiendesha kampeni za kuwazawadia wateja kwa miaka mitatu mfululizo, huku kampeni zilizotangulia zikiwa na zawadi kubwa za fedha taslimu pamoja na zawadi nyingine zenye thamani, zikiwemo magari.

Kwa mujibu wa Abigail, kampeni hizo zinaunga mkono dhamira ya benki hiyo ya “Kuiwezesha Afrika ya Kesho pamoja… Hatua moja baada ya nyingine”, kwa kutambua wateja wake na kuwasaidia kufikia malengo yenye umuhimu katika maisha yao.

Kampeni hiyo mpya pia ni sehemu ya mkakati mpana wa Absa wa kuongeza matumizi ya huduma za kibenki za kidijitali na kuhamasisha malipo yasiyotumia fedha taslimu katika matumizi ya kila siku, manunuzi ya mtandaoni na miamala ya biashara.

Meneja Bidhaa za Kadi wa Benki ya Absa Tanzania, Bi. Erica Mwaipopo (kulia), akizungumza jijini Dar es Salaam leo, katika uzinduzi rasmi wa Kampeni ya ‘Mkwanja Kiulaini na Kadi ya Absa’ yenye lengo la kuhamasisha matumizi ya huduma za kibenki kwa njia za kidigitali. Absa imetenga zawadi za pesa taslimu kiasi cha shs milioni 60 katika kampeni hiyo itkayodumu kwa muda wa miezi mitatu. Kulia kwake ni Mkuu wa Mikakati na Bidhaa za Wateja Binafsi, Bw. Heristraton Genesis na wafanyakazi wengine wa benki hiyo.

Mkuu wa Mikakati na Bidhaa za Wateja Binafsi wa Benki ya Absa Tanzania, Bw. Heristraton Genesis (wa nne kutoka kushoto, waliokaa), pamoja na baadhi ya wafanyakazi wa Absa, wakipozi mbele ya wapigapicha, wakati wa uzinduzi rasmi wa Kampeni ya ‘Mkwanja Kiulaini na Kadi ya Absa’ yenye lengo la kuhamasisha matumizi ya huduma za kibenki kwa njia za kidigitali. Absa imetenga zawadi za pesa taslimu kiasi cha shs milioni 60 katika kampeni hiyo itkayodumu kwa muda wa miezi mitatu.

Read More