SERIKALI YASIFU UBUNIFU WA XERIN MARKET KUKUZA UCHUMI WA KIDIJITALI

Mkurugenzi Mkuu wa Mamlaka ya Maendeleo ya Biashara Tanzania (TanTrade), Ephraim Mafuru (wa pili kulia), akisalimiana na Mwanzilishi na Mkurugenzi Mtendaji wa Kampuni ya Xerin Group Ltd, Hussein Jamal Ramadhani, wakati wa uzinduzi rasmi wa jukwaa la Soko la Kidijitali la Xerin Market, uliofanyika katika eneo la Kariakoo, Dar es Salaam, jana. Wanaoshuhudia tukio hilo kutoka kushoto ni Mkurugenzi wa Masoko na Mauzo wa Shirika la Posta Tanzania (TPC), Ferdinand Kabyemela; Mkurugenzi wa Maendeleo ya Biashara kutoka Wizara ya Viwanda na Biashara, Sempeho Manongi; na Furaha Mwangakala, aliyemwakilisha Mkuu wa Mkoa wa Dar es Salaam.

Mkurugenzi Mkuu wa Mamlaka ya Maendeleo ya Biashara Tanzania (TanTrade), Ephraim Mafuru, akizungumza wakati wa uzinduzi rasmi wa jukwaa la Soko la Kidijitali la Xerin Market, uliofanyika katika eneo la Kariakoo, Dar es Salaam, jana.

Na Mwandishi Wetu, Dar es Salaam: Serikali imesisitiza umuhimu wa matumizi ya teknolojia katika kukuza biashara na kuongeza fursa za kiuchumi kwa wananchi, huku ikipongeza kampuni ya Xerin Group Limited kwa kuanzisha jukwaa la biashara mtandaoni la Xerin Market.

Jukwaa hilo lilizinduliwa rasmi jana katika Soko la Kariakoo, Dar es Salaam, likilenga kuwaunganisha wafanyabiashara, wanunuzi na vijana wanaotafuta fursa za kujipatia kipato kupitia uchumi wa kidijitali.

Akizungumza katika hafla hiyo kwa niaba ya Waziri wa Viwanda na Biashara, Judith Salvio Kapinga, Mkurugenzi Mkuu wa Mamlaka ya Maendeleo ya Biashara Tanzania (TanTrade), Ephraim Mafuru, alisema hatua hiyo ni mfano wa mchango wa sekta binafsi katika kujenga uchumi wa kisasa unaotegemea teknolojia, ubunifu na maarifa.

Alisema Serikali chini ya uongozi wa Rais Samia Suluhu Hassan imeendelea kuweka mazingira wezeshi kwa biashara na uwekezaji, kuboresha miundombinu na kuhimiza matumizi ya teknolojia katika shughuli za kiuchumi.

Alieleza kuwa kupitia Dira ya Taifa ya Uchumi wa Kidijitali ya mwaka 2024–2034, Serikali imeweka mwelekeo wa kuimarisha matumizi ya teknolojia, kuongeza ujuzi wa kidijitali, kukuza ubunifu na kupanua ushiriki wa wananchi katika uchumi.

"Katika dunia ya leo, biashara haiwezi tena kutegemea njia za kawaida pekee. Teknolojia imebadilisha namna bidhaa zinavyotangazwa, kuuzwa, kulipiwa na kusafirishwa kutoka eneo moja kwenda jingine," alisema Mafuru.

Alisema jukwaa la Xerin Market litakuwa nyenzo muhimu kwa wafanyabiashara, hususan wadogo na wa kati, katika kutangaza bidhaa zao na kuwafikia wateja wengi zaidi.

Alitolea mfano wafanyabiashara wa Kariakoo, akisema kupitia teknolojia wanaweza kuwahudumia wateja walioko Dodoma, Mwanza, Arusha, Mbeya, Zanzibar na maeneo mengine bila wanunuzi hao kufika Dar es Salaam.

Mafuru alisema Soko la Kariakoo limeendelea kuwa kitovu muhimu cha biashara nchini na katika ukanda wa Afrika Mashariki, hivyo juhudi za kuboresha miundombinu yake zinapaswa kwenda sambamba na matumizi ya teknolojia ili kuongeza tija na ushindani.

Alisema Serikali imeendelea kuchukua hatua za kuboresha mazingira ya biashara katika eneo hilo, ikiwamo ujenzi na ukarabati wa miundombinu ya soko.

Hata hivyo, alisisitiza kuwa maendeleo ya Kariakoo hayapaswi kuishia katika majengo na miundombinu pekee, bali yanapaswa kuwapa wafanyabiashara uwezo wa kutumia mifumo ya kidijitali kufikia masoko mapana zaidi.

Akizungumzia fursa kwa vijana, Mafuru alisema amevutiwa na mfumo wa Winga ulioanzishwa kupitia Xerin Market, unaolenga kuwawezesha vijana, wanafunzi na wananchi wengine kutangaza bidhaa za wafanyabiashara waliosajiliwa na kupata kamisheni kutokana na mauzo wanayofanikisha.

Alisema mfumo huo unaweza kuwasaidia vijana kutumia simu, maarifa ya kidijitali na ujuzi wa masoko kujenga shughuli za kuwaingizia kipato bila kulazimika kumiliki maduka au kuhifadhi bidhaa.

Aliitaka kampuni kuhakikisha mfumo huo unaendeshwa kwa uwazi, masharti yanaeleweka na washiriki wanapata malipo yao kwa wakati.

Pia alisisitiza umuhimu wa kuzingatia sheria, kanuni na viwango vinavyohusu biashara, haki za watumiaji, ulinzi wa taarifa binafsi na usalama wa malipo.

Kwa upande wake, Mwanzilishi na Mkurugenzi Mtendaji wa Xerin Group Limited, Hussein Jamal Ramadhani, alisema kampuni hiyo inalenga kuifanya Tanzania kuwa kitovu cha biashara ya kidijitali na huduma za usafirishaji katika Afrika Mashariki na Kati.

Alisema Xerin Market si jukwaa la kutangaza na kuuza bidhaa pekee, bali ni sehemu ya mkakati mpana wa kuunganisha biashara ya kidijitali na huduma za logistics.

"Tunataka teknolojia na logistics ziwe nyenzo za kupanua masoko, kurahisisha biashara na kuongeza fursa za kipato kwa vijana," alisema Ramadhani.

Alisema kampuni inakusudia kutumia uzoefu wake katika huduma za usafirishaji wa mizigo kwa ndege na logistics kuunganisha wauzaji, wanunuzi, mifumo ya malipo na watoa huduma za usafirishaji.

Aidha, alisema kampuni inapanga kushirikiana na Shirika la Posta Tanzania katika huduma za usafirishaji wa bidhaa hadi kwa wateja, ili kurahisisha usambazaji wa bidhaa katika maeneo mbalimbali nchini.

Alisema Tanzania ina nafasi nzuri ya kimkakati katika biashara ya Afrika Mashariki na Kati kutokana na bandari, viwanja vya ndege, barabara na reli zinazoiunganisha na nchi jirani zikiwamo Rwanda, Burundi, Uganda na Zambia, pamoja na baadhi ya maeneo ya Jamhuri ya Kidemokrasia ya Congo.

Kwa mujibu wa kampuni hiyo, upanuzi wa huduma za biashara za kuvuka mipaka utategemea maendeleo ya teknolojia, miundombinu na makubaliano na washirika husika.

Uzinduzi huo uliwakutanisha wadau wa sekta binafsi na taasisi mbalimbali, wakiwamo wawakilishi wa TANTRADE, Shirikisho la Sekta Binafsi Tanzania (TPSF), Shirika la Posta Tanzania na Mfuko wa Taifa wa Hifadhi ya Jamii (NSSF).

Mwanzilishi na Mkurugenzi Mtendaji wa Kampuni ya Xerin Group Ltd, Hussein Jamal Ramadhani (kulia), akisalimiana na baadhi ya wageni waalikwa waliohudhuria uzinduzi rasmi wa jukwaa la Soko la Kidijitali la Xerin Market, uliofanyika katika eneo la Kariakoo, Dar es Salaam, jana. Wanaoshuhudia tukio hilo kutoka kushoto ni Mkurugenzi wa Masoko na Mauzo wa Shirika la Posta Tanzania (TPC), Ferdinand Kabyemela; Mkurugenzi wa Maendeleo ya Biashara kutoka Wizara ya Viwanda na Biashara, Sempeho Manongi; na Furaha Mwangakala, aliyemwakilisha Mkuu wa Mkoa wa Dar es Salaam.

Mkurugenzi Mkuu wa Mamlaka ya Maendeleo ya Biashara Tanzania (TanTrade), Ephraim Mafuru, ak Mwanzilishi na Mkurugenzi Mtendaji wa Kampuni ya Xerin Group Ltd, Hussein Jamal Ramadhani, wakipiga picha ya pamoja na baadhi ya wageni waliolikwa katika uzinduzi rasmi wa jukwaa la Soko la Kidijitali la Xerin Market, uliofanyika katika eneo la Kariakoo, Dar es Salaam, jana.

Read More

TAKUKURU YAREJESHA SH MILIONI 37 KWA KUDHIBITI MAGENDO YA MAFUTA

Taasisi ya Kuzuia na Kupambana na Rushwa (TAKUKURU), Mkoa wa Kinondoni, imefanikiwa kuiingizia Serikali mapato ya shilingi milioni 37,120,799 kupitia udhibiti wa uingizaji wa magendo ya mafuta ya kula katika eneo la Pwani ya Kunduchi, jijini Dar es Salaam.

Fedha hizo zimepatikana baada ya kukamatwa kwa madumu 510 ya mafuta ya kula, kila moja yakiwa na ujazo wa lita 20, yaliyokuwa yakiingizwa nchini bila kufuata taratibu za kisheria, ambapo kwa kushirikiana na Mamlaka ya Mapato Tanzania (TRA), wahusika walichukuliwa hatua na kulipa ushuru pamoja na adhabu stahiki.

Akizungumza na waandishi wa habari jijini Dar es Salaam wakati akiwasilisha taarifa ya utendaji kazi wa TAKUKURU Mkoa wa Kinondoni kwa kipindi cha Aprili hadi Septemba 2026, Naibu Mkuu wa TAKUKURU mkoani humo, Elizabeth Mokiwa, amesema uchunguzi uliofanyika ulibaini kuwa shehena hiyo haikuwa na nyaraka halali za uingizaji nchini wala uthibitisho wa kulipwa kwa kodi na ushuru.

Amesema hatua za kisheria zilichukuliwa dhidi ya wahusika, wakiwemo mmiliki wa shehena ya mafuta hayo pamoja na mmiliki wa gari lililotumika katika usafirishaji wake, hatua iliyowezesha Serikali kurejeshewa mapato hayo.

TAKUKURU imewataka wananchi kujiepusha na vitendo vya rushwa, magendo na ukwepaji kodi, ikieleza kuwa vitendo hivyo vinasababisha upotevu wa mapato ya Serikali ambayo ni muhimu katika kugharamia miradi na huduma za maendeleo.

Taasisi hiyo imesisitiza kuwa itaendelea kushirikiana na mamlaka nyingine za Serikali katika kuzuia mianya ya upotevu wa mapato na kuhakikisha sheria zinafuatwa kwa lengo la kulinda uchumi wa taifa.

Read More

AKAUNTI YA MALKIA YA CRDB: CHACHU YA UWEZESHAJI WA WANAWAKE KIFEDHA NA UKUAJI WA BIASHARA

Kwa nini kila mwanamke mjasiriamali anapaswa kuwa na mpango maalumu wa kuweka akiba na kusimamia fedha zake?

Na: Bi. Lilianfavour Makawa

Team Leader – Sales and Service/Support

CRDB Bank Plc, Ubungo Branch – Dar es Salaam

Katika ulimwengu wa sasa wa biashara na ujasiriamali, uwezeshaji wa mwanamke kiuchumi haupaswi kuishia katika kumpatia mtaji wa kuanzisha biashara pekee. Unapaswa kwenda mbali zaidi kwa kumjengea uwezo wa kusimamia fedha, kuweka akiba, kufanya maamuzi sahihi ya kifedha na kutumia huduma za kibenki kama nyenzo ya kukuza shughuli zake za kiuchumi.

Katika uzoefu wangu wa kitaalamu katika eneo la mauzo, huduma na usaidizi kwa wateja wa benki, nimeendelea kutambua umuhimu wa elimu ya kifedha katika kuwasaidia wateja kuelewa na kutumia huduma za kibenki kwa ufanisi zaidi.

Mojawapo ya mambo muhimu ninayopenda kuyasisitiza ni kwamba mafanikio ya kifedha hayategemei tu kiasi cha fedha tunachopata, bali pia namna tunavyopanga, kuhifadhi na kutumia fedha hizo.

Kwa mwanamke mjasiriamali, kuwa na biashara inayozalisha mapato ni hatua muhimu. Lakini kuwa na utaratibu mzuri wa kusimamia mapato hayo, kutenga akiba na kujiandaa kwa mahitaji ya baadaye ndiyo hatua inayoweza kusaidia kujenga msingi imara wa maendeleo ya biashara.

Katika muktadha huo, ningependa kuangazia nafasi ya Akaunti ya Malkia ya CRDB Bank kama mojawapo ya huduma za kifedha zinazolenga kuwasaidia wanawake kujenga utamaduni wa kuweka akiba na kufikia malengo yao.

1. AKAUNTI YA MALKIA: ZAIDI YA AKAUNTI YA KAWAIDA YA AKIBA

Akaunti ya Malkia ni bidhaa maalumu ya CRDB Bank iliyoundwa kwa ajili ya wanawake wanaotaka kuweka akiba na kusimamia malengo yao ya kifedha.

Kwa mtazamo wangu, umuhimu wa akaunti hii hauishii katika kuhifadhi fedha pekee. Unapaswa pia kuangaliwa katika muktadha wa kumjengea mwanamke utamaduni wa kupanga fedha zake na kuwa na malengo yanayotekelezeka.

Mwanamke anaweza kuwa na malengo mbalimbali, kama vile kuongeza mtaji wa biashara, kuanzisha biashara mpya, kulipia elimu, kugharamia mahitaji ya afya au kujiandaa kwa mahitaji ya familia.

Badala ya kusubiri mpaka apate kiasi kikubwa cha fedha, anaweza kuanza kuweka akiba kidogo kidogo na kuendelea kujenga msingi wa kutimiza malengo hayo.

Ninapenda kusisitiza kwamba akiba si suala la kuwa na fedha nyingi, bali ni suala la kuwa na nidhamu ya fedha. Kiasi unachoweza kuweka leo kinaweza kuwa sehemu ya msingi wa mafanikio yako ya kesho.

2. KWA NINI WANAWAKE WAJASIRIAMALI WANAHITAJI AKAUNTI YA MALKIA?

Wanawake wengi nchini Tanzania wanajishughulisha na shughuli mbalimbali za kiuchumi. Wapo wanaomiliki maduka, saluni, migahawa, biashara za nguo, vipodozi, kilimo, ushonaji na biashara za mtandaoni.

Pamoja na juhudi zao, changamoto inayoweza kujitokeza ni kutokuwa na utaratibu maalumu wa kutenganisha fedha za biashara na matumizi binafsi.

Kwa mfano, mwanamke anaweza kuwa na biashara yenye mauzo mazuri lakini akashindwa kupanua biashara hiyo kwa sababu mapato yote yanaelekezwa katika matumizi ya kila siku.

Hapa ndipo umuhimu wa kuwa na akaunti ya akiba unapojitokeza.

Ningewashauri wanawake wajasiriamali kuwa na utaratibu wa kutenga sehemu ya mapato au faida ya biashara kwa ajili ya akiba. Hatua hii inaweza kusaidia katika:

Kuongeza mtaji wa biashara: Akiba inaweza kuwa sehemu ya maandalizi ya kuongeza bidhaa au huduma mpya.

Kupanua biashara: Mwanamke anaweza kuweka fedha kwa ajili ya kufungua tawi jingine au kupanua eneo la biashara.

Kununua vifaa vya biashara: Kwa mfano, mashine za kushonea, vifaa vya saluni, majokofu, mashine za uzalishaji au vifaa vya kisasa vya kazi.

Kukabiliana na changamoto za kifedha: Akiba inaweza kusaidia wakati biashara inapokabiliwa na changamoto zisizotarajiwa.

Kujenga uhuru wa kifedha: Kuwa na akiba kunampa mwanamke nafasi nzuri zaidi ya kupanga mahitaji yake na kufanya maamuzi ya kifedha kwa kujiamini.

Kwa hiyo, ninawaasa wanawake wasitazame akiba kama fedha zilizozuiliwa kutumika, bali kama maandalizi ya kutimiza malengo yao ya baadaye.

3. FAHAMU FAIDA ZA AKAUNTI YA MALKIA YA CRDB

CRDB Bank imeweka huduma mbalimbali katika Akaunti ya Malkia zinazolenga kurahisisha utunzaji wa akiba kwa wanawake.

Miongoni mwa sifa na faida zinazotangazwa kwa akaunti hii ni:

i. Kiasi cha kufungua akaunti

Akaunti inaweza kufunguliwa kwa kiwango cha chini cha TZS 5,000.

ii. Sarafu mbalimbali

Akaunti inapatikana katika sarafu za Shilingi za Tanzania (TZS) na Dola za Marekani (USD).

iii. Riba ya akiba

Akaunti ina utaratibu wa kupata riba inayohesabiwa na kulipwa kila mwezi kwa mujibu wa masharti ya bidhaa husika.

iv. Hakuna ada za kila mwezi na miamala

Akaunti inaelezwa kutokuwa na ada za kila mwezi na miamala.

v. Mkopo wa dharura

Mteja anaweza kustahili kupata mkopo wa dharura wa hadi asilimia 90 ya kiasi alichohifadhi, kwa kuzingatia masharti na tathmini ya benki.

vi. Punguzo la bima

Wateja wanaweza kupata punguzo la hadi asilimia 15 kwa bima zinazostahili kununuliwa kupitia CRDB Bank.

Ni muhimu kwa kila mteja kuthibitisha masharti ya sasa, viwango na upatikanaji wa huduma hizi kupitia CRDB Bank kabla ya kufanya maamuzi.

4. KWA NINI NINASISITIZA UMUHIMU WA BANK OPERATIONS KATIKA USIMAMIZI WA FEDHA?

Katika sekta ya kibenki, huduma bora kwa wateja haziishii katika kufungua akaunti au kupokea maombi ya huduma. Zinahusisha pia kuhakikisha kuwa wateja wanaelewa namna ya kutumia huduma hizo kwa usahihi, usalama na ufanisi.

Eneo la Bank Operations lina nafasi muhimu katika kuhakikisha shughuli za kila siku za benki zinaendeshwa kwa utaratibu, usahihi na kuzingatia taratibu zilizowekwa.

Kwa upande wa mteja, mambo muhimu ni pamoja na:

Usahihi wa miamala: Kila mteja anapaswa kuhakikisha anaelewa na kuthibitisha miamala anayofanya, pamoja na kuhifadhi kumbukumbu za miamala yake.

Usalama wa akaunti: Ni muhimu kulinda taarifa za akaunti, PIN, nywila na taarifa nyingine za siri. Benki haitakiwi kupewa nafasi ya mtu mwingine kutumia taarifa zako kufanya miamala bila idhini yako.

Uelewa wa huduma: Mteja anapaswa kujua aina ya akaunti aliyonayo, gharama zinazohusika, masharti ya matumizi na huduma zinazopatikana.

Huduma kwa wateja: Mteja anapokutana na changamoto, ni muhimu kutumia njia rasmi za mawasiliano za benki ili kupata msaada na ufumbuzi.

Ufanisi wa kidigitali: Matumizi ya huduma za kidigitali yanaweza kurahisisha upatikanaji wa huduma na kupunguza utegemezi wa kufika katika matawi kwa kila muamala.

Kwa mtazamo wangu, benki yenye huduma bora inapaswa kwenda sambamba na mteja katika safari yake ya kifedha kwa kumwezesha kuelewa huduma anazotumia na namna ya kuzitumia kwa manufaa yake.

5. MFANO WA KIFEDHA: TSH 50,000 KWA MWEZI INAWEZA KUWA MWANZO WA MAFANIKIO MAKUBWA

Ninapokutana na wazo kwamba mtu hawezi kuweka akiba kwa sababu kipato chake ni kidogo, huwa napenda kusisitiza umuhimu wa kuanza na kiasi ambacho mtu anaweza kumudu.

Tuchukulie mfano wa mwanamke mjasiriamali anayeamua kutenga TZS 50,000 kila mwezi kwa ajili ya akiba.

Ndani ya mwaka mmoja, atakuwa ameweka jumla ya TZS 600,000 bila kuhesabu riba yoyote.

Akidumisha utaratibu huo kwa miaka miwili, atakuwa ameweka TZS 1,200,000, na kwa miaka mitatu atakuwa ameweka TZS 1,800,000, bila kuhesabu riba au mabadiliko ya kiasi anachoweka.

Hii inatuonyesha kwamba nidhamu ya kuweka akiba inaweza kuwa na matokeo makubwa kadiri muda unavyopita.

Kwa mwanamke anayefanya biashara, fedha hizi zinaweza kuwa sehemu ya maandalizi ya kuongeza bidhaa, kununua vifaa au kutekeleza mpango mwingine wa maendeleo.

Jambo la msingi ni kuweka lengo linaloeleweka na kuwa na utaratibu wa kulitekeleza.

6. AKAUNTI YA MALKIA NA MAONO YA KUWAWEZESHA WANAWAKE KIUCHUMI

Uwezeshaji wa wanawake kiuchumi ni jambo linalohitaji ushirikiano kati ya wanawake wenyewe, taasisi za kifedha, sekta binafsi na wadau wengine wa maendeleo.

Kupitia mpango wa Malkia, CRDB Bank imeendelea kuweka msisitizo katika upatikanaji wa huduma za kifedha kwa wanawake, wakiwemo wajasiriamali wanaohitaji kujenga uwezo wa kusimamia na kukuza shughuli zao za kiuchumi.

Ni muhimu kuelewa kuwa huduma za akiba na huduma za mikopo zina majukumu tofauti.

Akaunti ya Malkia inalenga kusaidia wanawake kuweka akiba, wakati mikopo na huduma nyingine za kifedha zinapatikana kwa kuzingatia bidhaa husika, vigezo na masharti ya benki.

Ninawahimiza wanawake kutumia fursa za elimu ya kifedha, kujifunza kuhusu huduma zinazopatikana na kuuliza maswali kabla ya kufanya maamuzi ya kifedha.

Mwanamke mwenye maarifa ya kifedha ana nafasi nzuri zaidi ya kupanga biashara yake, kutathmini fursa na kusimamia changamoto zinazoweza kujitokeza.

7. UNAWEZAJE KUFUNGUA AKAUNTI YA MALKIA?

Kwa mujibu wa taarifa za bidhaa za CRDB Bank, wanawake wenye umri wa miaka 18 na kuendelea wanaweza kuomba kufungua Akaunti ya Malkia kwa kutumia kitambulisho kinachokubalika na benki.

Baadhi ya vitambulisho vinavyoweza kutumika ni:

• Kitambulisho cha Taifa cha NIDA au namba ya NIDA.

• Kitambulisho cha Mpiga Kura.

• Pasipoti.

• Leseni ya Udereva.

• Kitambulisho cha Mzanzibar.

Maombi yanaweza kufanyika kupitia SimBanking App au kwa kutembelea tawi la CRDB Bank kwa maelezo na msaada zaidi.

Ninawahimiza wanawake wanaopenda kufungua akaunti hii kutembelea matawi ya CRDB Bank au kutumia njia rasmi za mawasiliano ili kupata maelezo ya kina kuhusu masharti ya akaunti na utaratibu wa kuifungua.

8. UJUMBE WANGU KWA WANAWAKE WAJASIRIAMALI

Ningependa kutumia nafasi hii kuwahimiza wanawake wote, hasa wale wanaojishughulisha na biashara ndogo, za kati na kubwa, kutambua umuhimu wa kuwa na mipango ya kifedha.

Usiangalie tu kiasi cha fedha unachopata kila siku; angalia pia kiasi unachoweza kutenga kwa ajili ya kesho.

Usisubiri mpaka biashara yako iwe kubwa ndipo uanze kuweka akiba. Anza na kiasi kidogo, jenga nidhamu na endelea kuboresha mipango yako kadiri biashara yako inavyokua.

Pia, usisite kuuliza maswali kuhusu huduma za kibenki. Fahamu haki zako kama mteja, elewa gharama za huduma unazotumia na tumia njia rasmi za kupata ushauri na msaada.

Ninaamini kuwa uwezeshaji wa kweli wa mwanamke kiuchumi unaanza pale anapokuwa na maarifa, uwezo wa kufanya maamuzi na nidhamu ya kusimamia rasilimali zake.

Akaunti ya Malkia inaweza kuwa sehemu ya safari hiyo. Muhimu ni kuanza, kuweka malengo na kuyafanyia kazi kwa nidhamu.

HITIMISHO: MWANAMKE, JENGA AKIBA LEO KWA AJILI YA MUSTAKABALI WAKO WA KESHO

Mafanikio ya kifedha hayajengwi kwa siku moja. Yanahitaji mipango, nidhamu, maarifa na matumizi sahihi ya fursa zinazopatikana.

Kwa mwanamke mjasiriamali, kuwa na utaratibu wa kuweka akiba ni hatua muhimu katika kujenga biashara imara na kuimarisha maisha yake ya kiuchumi.

Kupitia Akaunti ya Malkia ya CRDB Bank, wanawake wana nafasi ya kuanza safari ya kuweka akiba na kujiandaa kutimiza malengo yao ya kifedha.

Kumbuka: Biashara yako inaweza kuwa ndogo leo, lakini kwa mipango sahihi ya kifedha, nidhamu ya kuweka akiba na maamuzi bora, unaweza kuandaa msingi wa ukuaji mkubwa kesho.

SWALI KWA WANAWAKE WAJASIRIAMALI

Ningependa kusikia kutoka kwenu:

• Je, una utaratibu wa kutenga sehemu ya mapato ya biashara yako kwa ajili ya akiba?

• Ni changamoto gani kubwa inayokuzuia kuweka akiba mara kwa mara?

• Kama ungeweza kuweka akiba kwa lengo moja kubwa, ungependa iwe ni kuongeza mtaji, kupanua biashara au kuwekeza katika mradi mpya?

Shiriki maoni yako. Elimu ya kifedha inaanza kwa kujifunza, kuuliza na kuchukua hatua.

Maudhui haya yameandaliwa kwa madhumuni ya elimu ya kifedha. Maelezo ya bidhaa, viwango na masharti yanapaswa kuthibitishwa kupitia njia rasmi za CRDB Bank.

Read More

WATALII MILIONI 1.5 NA MAPATO BILIONI 534! TANAPA YAWEKA WAZI MAFANIKIO

Shirika la Hifadhi za Taifa Tanzania (TANAPA) limeeleza mafanikio makubwa katika kipindi cha uongozi wa Rais Samia Suluhu Hassan, likiwa limeongeza idadi ya watalii kutoka 700,000 mwaka wa fedha 2021/22 hadi zaidi ya milioni 1.5 mwaka 2025/26, huku mapato yakiongezeka kutoka shilingi bilioni 174 hadi zaidi ya bilioni 534 katika kipindi hicho.

Akizungumza na wahariri na waandishi wa habari leo Novemba 10, 2026, jijini Dar es Salaam, Kamishna wa Uhifadhi wa TANAPA, Massana Gibril Mwishawa, amesema idadi ya watalii imekuwa ikiongezeka kwa wastani wa asilimia 24, hatua inayoonesha ukuaji wa shughuli za utalii katika hifadhi za taifa.

Amesema sambamba na ongezeko la watalii, makusanyo ya shirika yamepanda kutoka shilingi bilioni 174 mwaka 2021/22 hadi zaidi ya shilingi bilioni 534 mwaka 2025/26, jambo linaloongeza uwezo wa shirika kuendeleza shughuli za uhifadhi na kutekeleza miradi mbalimbali ya maendeleo.

Mwishawa amesema katika utekelezaji wa Dira ya Taifa ya Maendeleo, TANAPA imejipanga kutekeleza miradi yote ya maendeleo iliyopangwa pamoja na kuvutia wawekezaji wengi zaidi katika sekta ya utalii, hatua inayotarajiwa kupanua fursa za kiuchumi na kuongeza ajira kwa vijana katika mnyororo mzima wa thamani wa utalii, ikiwemo usafiri, malazi, huduma za chakula na shughuli nyingine zinazohusiana na sekta hiyo.

Amesisitiza kuwa mafanikio ya uhifadhi hayapaswi kuangaliwa kwa wingi wa wanyamapori, misitu na maliasili nyingine zinazolindwa pekee, bali pia kwa namna shughuli za uhifadhi zinavyoboresha maisha ya wananchi wanaozunguka maeneo ya hifadhi na jamii kwa ujumla.

“Mafanikio ya uhifadhi hayawezi kupimwa kwa maliasili tunazozihifadhi pekee, bali yatapimwa pia kwa maisha ya wananchi kutokana na uhifadhi tunaoufanya,” amesema Mwishawa.

Kauli hiyo inaweka msisitizo katika umuhimu wa kuunganisha uhifadhi na maendeleo ya wananchi, ili ukuaji wa sekta ya utalii uende sambamba na upatikanaji wa fursa za ajira, uwekezaji na manufaa ya kiuchumi kwa jamii, huku rasilimali za taifa zikiendelea kulindwa kwa manufaa ya vizazi vya sasa na vijavyo.

Read More

SERIKALI YATAKA TIBA ASILIA ZIGEUZWE KUWA DAWA

SERIKALI imetoa wito kwa vyuo vikuu, taasisi za utafiti na sekta binafsi kuhakikisha tafiti zinazohusu tiba asilia zinageuzwa kuwa dawa zinazoweza kutumika kutibu magonjwa mbalimbali, badala ya kubaki kwenye machapisho ya kitaaluma.

Wito huo umetolewa leo Nov 9,2026 na Naibu Waziri wa Elimu, Sayansi na Teknolojia, Wanu Hafidh Ameir, wakati wa kufungua Kongamano la Kuendeleza Sayansi katika Tiba (Advancing Science in Medical Field), lililofanyika jijini Dar es Salaam, ambapo amesema tafiti na ubunifu ni muhimu katika kuongeza uwezo wa nchi kuzalisha dawa na vifaa tiba.

Amesema Serikali inatambua umuhimu wa kuimarisha mfumo wa kitaifa na mpango kazi wa kuendeleza utafiti, ugunduzi na ubia katika uzalishaji wa dawa na vifaa tiba, ikiwemo vinavyotokana na mimea tiba na maarifa ya tiba asilia.

Ameeleza kuwa maeneo yanayopaswa kupewa kipaumbele ni pamoja na ukusanyaji na uhifadhi wa maarifa ya tiba asilia, kuendeleza matokeo ya tafiti hadi kuwa bidhaa zinazoweza kuzalishwa na kutumika pamoja na kuimarisha ushirikiano kati ya vyuo vikuu, taasisi za utafiti na viwanda.

Kwa upande wake, Makamu Mkuu wa Chuo Kikuu cha Afya na Sayansi Shirikishi Muhimbili (MUHAS), Profesa Appolinary Kamuhabwa, amesema chuo hicho kimetenga ekari 200 kati ya ekari 400 za eneo lake kwa ajili ya kuotesha mimea inayotumika kutengeneza dawa asilia.

Amesema kupitia Taasisi ya Dawa Asili iliyopo chuoni hapo tangu miaka ya 1970, tayari wameanza kuotesha baadhi ya mimea hiyo katika bustani maalumu inayofahamika kama Botanical Garden, ambayo itasaidia kuhifadhi na kutambua aina mbalimbali za mimea tiba.

Amesema MUHAS inalenga kushirikiana na wadau mbalimbali kuendeleza dawa za asili ambazo zimeonyesha uwezo wa kusaidia wagonjwa kwa kuzipeleka katika hatua zaidi za utafiti, ikiwemo majaribio ya kitabibu (clinical trials), ili kuthibitisha usalama na ufanisi wake.

Ameeleza kuwa tayari chuo hicho kimewasilisha mapendekezo kuhusu baadhi ya dawa zilizoonyesha kusaidia wagonjwa ili ziendelee kufanyiwa uchunguzi wa kitaalamu, kuboreshwa na kuthibitishwa kabla ya kutumika kwa upana zaidi.

Naye Mkurugenzi Mkuu wa Taasisi ya Utafiti wa Afya Zanzibar, Dkt. Mayassa Salumu Ally, amesema upembuzi uliofanywa Zanzibar umebaini kuwepo kwa zaidi ya aina 300 za mimea inayotumika katika tiba asilia, huku utafiti uliofanywa takribani miaka minne iliyopita kwa kushirikiana na Chuo Kikuu cha Berlin ukibaini kuwa asilimia 96 ya Wazanzibari hutumia tiba hiyo katika maisha yao ya kila siku.

Amesema maeneo ya Kusini Unguja, hususan Makunduchi na Kizimkazi, yana idadi kubwa ya mimea tiba pamoja na wataalamu wa tiba asilia ambao wamekuwa wakihudumia wananchi kwa kutumia maarifa waliyorithi kutoka vizazi vilivyotangulia.

Ameeleza kuwa taasisi hiyo imekuwa ikishirikiana na waganga wa tiba asilia kurekodi maarifa yao, dawa wanazotumia na aina za mimea ili kuhifadhi ujuzi huo, huku akitaja mmea wa Aloe Vera Pembana unaopatikana Vitongoji na Mwambe, Pemba, kuwa miongoni mwa mimea inayohitaji utafiti zaidi wa kisayansi.

Amesema kupitia ufadhili wa Tume ya Taifa ya Sayansi na Teknolojia (COSTECH), taasisi hiyo imepata fedha kwa ajili ya utafiti na uendelezaji wa dawa zinazotokana na tiba asilia zinazolenga kusaidia matibabu ya kisukari, shinikizo la damu na pumu.

Kwa upande wake, Mwenyekiti wa Baraza la Tiba Asili na Tiba Mbadala Tanzania, Profesa Joseph Otieno, amesema kutambuliwa kwa umuhimu wa tiba asilia na Serikali, wanasayansi na hospitali kunatoa fursa ya kuimarisha ushirikiano kati ya waganga wa tiba asilia na wataalamu wa kisayansi, ili kuendeleza maarifa yaliyopo kwa manufaa ya jamii.

Amesema ushirikiano huo ni muhimu katika kuhakikisha dawa zinazotokana na tiba asilia zinafanyiwa tafiti na kuthibitishwa kitaalamu, huku Naibu Waziri akisisitiza kuwa bidhaa zote za dawa na vifaa tiba lazima zizingatie usalama na ufanisi kabla ya kuzalishwa na kutumiwa na wananchi.

Read More

NMB YAWAKUTANISHA WADAU WA KOROSHO MTWARA, CBT YAHAKIKISHA MALIGHAFI KWA VIWANDA

MTWARA: November 7, 2026 - Benki ya NMB imewakutanisha wadau mbalimbali wa sekta ya korosho mkoani Mtwara katika kikao kilicholenga kujadili fursa za ufadhili na kutafuta suluhisho la changamoto zinazokabili mnyororo wa thamani wa zao hilo, huku Bodi ya Korosho Tanzania (CBT) ikiwahakikishia wawekezaji upatikanaji wa malighafi za kutosha kwa ajili ya viwanda vya kubangua korosho.

Mkurugenzi Mkuu wa CBT, Francis Alfred, amesema bodi hiyo itahakikisha wawekezaji wanaowekeza mitaji mikubwa katika ujenzi wa viwanda vya kubangua korosho hawakabiliwi na changamoto ya kukosa korosho ghafi za kuendesha shughuli zao.

Alfred alitoa kauli hiyo Novemba 7, 2026, mkoani Mtwara, wakati wa kikao cha wadau wa korosho kilichoandaliwa na NMB, kikihusisha wabanguaji, wanunuzi na wafanyabiashara wa zao hilo.

Amesema dhamira ya kuhakikisha upatikanaji wa malighafi inakwenda sambamba na juhudi za Serikali za kuongeza uwezo wa viwanda vya kubangua korosho nchini ifikapo mwaka 2030.

NMB Yapongezwa kwa kuwaunganisha wadau

Alfred amepongeza hatua ya NMB ya kuwakutanisha wadau wa sekta hiyo, akieleza kuwa ushirikiano kati ya taasisi za fedha na wafanyabiashara wa korosho ni muhimu katika kuongeza uzalishaji na kuimarisha shughuli za biashara katika mnyororo mzima wa thamani wa zao hilo.

Aidha, amezihimiza taasisi nyingine za fedha kuwa karibu na wadau wa sekta ya korosho ili kuelewa mahitaji yao na kubuni masuluhisho ya kifedha yatakayochochea ukuaji wa biashara.

Pia amezitaka benki kuhakikisha wakulima wanalipwa kwa wakati ili kuwawezesha kukidhi mahitaji yao ya kifedha na kujiandaa kwa shughuli zinazofuata za uzalishaji.

NMB Yajipanga Kusaidia Biashara za Korosho Msimu wa 2026/2027

Kwa upande wake, Mkuu wa Idara ya Biashara ya Kilimo kwa Wateja Wakubwa wa NMB, Christopher Mwalugenge, amesema benki hiyo imejipanga kutoa huduma mbalimbali za kifedha kusaidia biashara za korosho katika msimu wa 2026/2027.

Amesema masuluhisho hayo yanalenga kuwawezesha wanunuzi wa korosho wanaoshiriki katika minada na masoko ya awali kupata mitaji ya kutosha ili kununua mazao kwa wakati na kwa kiwango kinachohitajika.

Vilevile, amesema NMB imeweka mazingira ya kuwawezesha wabanguaji kupata fedha za kununua korosho ghafi kwa ajili ya kuendesha viwanda vyao na kuongeza uzalishaji wa korosho zilizobanguliwa nchini.

Katika hatua nyingine, Mwalugenge amesema benki hiyo inatoa masuluhisho ya kifedha yanayokidhi mahitaji ya wasafirishaji wa korosho nje ya nchi, ikiwa ni pamoja na kuwawezesha kufanya manunuzi kwa wakati na kutekeleza mikataba yao ya biashara katika masoko ya kimataifa.

Ameongeza kuwa NMB imeimarisha pia huduma za malipo na miamala ili kurahisisha shughuli za biashara katika hatua mbalimbali za mnyororo wa thamani wa korosho.

Kuimarisha Ushirikiano Katika Sekta ya Korosho

Kikao hicho cha wadau kinatarajiwa kuimarisha ushirikiano kati ya taasisi za fedha na wadau wa sekta ya korosho, hususan katika kuongeza upatikanaji wa mitaji, kuchochea uwekezaji katika viwanda vya kubangua korosho nchini na kuhakikisha wakulima wanapata malipo kwa wakati.

Kupitia ushirikiano huo, upatikanaji wa fedha kwa wanunuzi, wabanguaji na wasafirishaji unatarajiwa kusaidia kuongeza ufanisi wa biashara ya korosho na kuchangia katika kukuza thamani ya zao hilo ndani ya nchi.

Hatua hiyo pia inaunga mkono azma ya kupanua uwezo wa Tanzania wa kubangua korosho ndani ya nchi ifikapo mwaka 2030, hatua inayolenga kuimarisha mnyororo wa thamani wa zao hilo na kuongeza manufaa ya kiuchumi kwa wadau wake.

Read More

MAADILI NA UTAWALA BORA KATIKA BIASHARA: WATAALAMU KUTOKA NCHI MBALIMBALI ZA AFRIKA WAKUTANA TANZANIA

Mkurugenzi Mtendaji wa Benki ya Absa Tanzania, Obedi Laiser (wa pili kushoto), akishikana mikono na Kamishna wa Sekretarieti ya Maadili, Ofisi ya Rais, Jaji Mstaafu Sivangilwa Sikalalilwa Mwangesi, wakati wa mkutano wa siku mbili kuhusu Maadili ya Biashara wa Absa BEN-Africa 2026, uliodhaminwa na benki hiyo na kuhitimishwa leo katika Shule ya Biashara ya Chuo Kikuu cha Dar es Salaam (UDBS), jijini Dar es Salaam. Mkutano huo uliandaliwa kwa ushirikiano kati ya Benki ya Absa, Mtandao wa BEN-Afrika na Chuo Kikuu cha Dar es Salaam ukiangazia nafasi ya misingi ya maadili katika kukuza biashara endelevu na maendeleo ya kiuchumi barani Afrika. Kutoka kushoto ni Mtaalamu Mwandamizi wa Maadili kutoka Absa Group, Moses Chisadza na Mwenyekiti wa Bodi wa Benki ya Absa Tanzania, Paul Makanza.

Mkurugenzi Mtendaji wa Benki ya Absa Tanzania, Obedi Laiser (Katikati), akishikana mikono na Rais wa Mtandao wa Maadili ya Biashara Afrika wa BEN-Africa, Dk. Bryan Robinson, wakati wa mkutano wa siku mbili kuhusu Maadili ya Biashara wa Absa BEN-Africa 2026, uliodhaminwa na benki hiyo, ukihitimishwa leo katika Shule ya Biashara ya Chuo Kikuu cha Dar es Salaam (UDBS), jijini Dar es Salaam. Mkutano huo uliandaliwa kwa ushirikiano kati ya Benki ya Absa, Mtandao wa BEN-Afrika na Chuo Kikuu cha Dar es Salaam ukiangazia nafasi ya misingi ya maadili katika kukuza biashara endelevu na maendeleo ya kiuchumi barani Afrika. Kushoto ni Mkurugenzi wa Sheria na Udhibiti, Alistides Kashasira.

TANZANIA imepata nafasi muhimu katika mijadala ya kimataifa kuhusu maadili ya biashara, uongozi wenye uwajibikaji na utawala bora, baada ya mkutano wa siku mbili wa Absa BEN-Africa 2026 kuhitimishwa kwa mafanikio katika Shule ya Biashara ya Chuo Kikuu cha Dar es Salaam (UDBS).

Mkutano huo uliowakutanisha wasomi, viongozi wa sekta binafsi, watunga sera, wasimamizi wa sekta mbalimbali, wanafunzi na wataalamu wa masuala ya maadili kutoka nchi mbalimbali za Afrika, Ulaya na Marekani, ulijadili nafasi ya misingi ya kimaadili katika kukuza biashara endelevu na maendeleo ya kiuchumi barani Afrika.

Mkutano huo ulioandaliwa kwa ushirikiano kati ya Benki ya Absa Tanzania, Mtandao wa Maadili ya Biashara Afrika (BEN-Africa) na Chuo Kikuu cha Dar es Salaam, ulikuwa na kaulimbiu isemayo “Mitazamo Tofauti kuhusu Maadili ya Biashara: Misingi ya Kiafrika na Zaidi ya Hapo.”

Akizungumza katika hafla ya ufungaji rasmi wa mkutano huo, Dar es Salaam jana, Kamishna wa Sekretarieti ya Maadili, Ofisi ya Rais, Jaji Mstaafu Sivangilwa Sikalalilwa Mwangesi, aliwataka washiriki kutambua kuwa maadili si kikwazo cha maendeleo, bali ni msingi muhimu wa kuyafikia.

Alisisitiza kuwa ustawi endelevu wa kiuchumi, utawala bora na imani ya wananchi kwa taasisi mbalimbali haviwezi kutenganishwa na uongozi unaozingatia maadili.

Kwa upande wake, Mwenyekiti wa Bodi ya Wakurugenzi ya Absa Bank Tanzania, Paul Makanza katika hotuba yake ya ukaribisho, alisisitiza umuhimu wa kuwakutanisha wadau kutoka vyuo vikuu, sekta binafsi, serikali na asasi za kiraia ili kujadili kwa pamoja changamoto na fursa za kimaadili zinazoweza kuathiri mustakabali wa Afrika.

Katika kipindi chote cha siku mbili, washiriki walijadili masuala mbalimbali yakiwemo mitazamo ya Kiafrika na Magharibi kuhusu maadili ya biashara, uhusiano kati ya faida, madaraka na uwajibikaji wa kampuni, ukuaji endelevu wa uchumi, ujasiriamali unaozingatia maadili, uwajibikaji wa kampuni kwa jamii, maadili katika sekta ya utalii, falsafa ya Ubuntu na matumizi ya Akili Unde (Artificial Intelligence – AI), pamoja na utawala bora katika dunia inayozidi kuunganishwa.

Mijadala hiyo ilihusisha wasomi mashuhuri, viongozi waandamizi wa kampuni, wasimamizi wa sekta na wataalamu wa masuala ya uongozi, ambao walitoa mitazamo na uzoefu wao kuhusu namna ya kuimarisha maadili katika shughuli za biashara na taasisi za umma.

Miongoni mwa hoja muhimu zilizojitokeza ni kwamba Afrika ina falsafa, tamaduni na mifumo yake ya thamani inayoweza kuchangia kwa kiasi kikubwa katika mijadala ya kimataifa kuhusu maadili na uongozi wenye uwajibikaji.

Washiriki walijadili namna falsafa ya Ubuntu, inayosisitiza utu, mshikamano, uwajibikaji wa pamoja na kuthamini maslahi ya wadau wote, inavyoweza kutumika kuimarisha mifumo ya kisasa ya uongozi na uendeshaji wa biashara.

Pia, kulikuwa na mjadala mpana kuhusu uhusiano kati ya kutengeneza faida na kutimiza wajibu kwa jamii, ambapo washiriki walikubaliana kuwa mafanikio ya muda mrefu ya biashara yanahitaji uwiano kati ya malengo ya kibiashara, uwajibikaji wa kijamii, utunzaji wa mazingira na uzingatiaji wa maadili.

Mijadala mingine iligusia umuhimu wa uongozi unaozingatia maadili katika kukabiliana na changamoto zinazojitokeza kutokana na mabadiliko ya teknolojia, matumizi ya Akili Unde, mabadiliko ya tabianchi, ukosefu wa usawa na matarajio yanayobadilika ya wadau mbalimbali.

Akizungumzia mafanikio ya mkutano huo katika hafla ya ufungaji rasmi wa mkutano huo jijini humo leo, Mkurugenzi Mtendaji wa Benki ya Absa Tanzania, Obedi Laiser, alisema ubora wa mijadala iliyofanyika katika siku hizo mbili umeonesha kuwa Afrika ina uwezo wa kitaaluma na kiuongozi wa kushiriki kikamilifu katika kuunda mijadala ya kimataifa kuhusu maadili, utawala bora na biashara zinazowajibika.

“Ubora wa mijadala tuliyoishuhudia katika siku hizi mbili umekuwa wa kipekee. Mkutano huu umeonesha kuwa Afrika ina uwezo wa kitaaluma na kiuongozi unaohitajika katika kuongoza mijadala ya kimataifa kuhusu maadili, utawala bora na biashara zinazowajibika."

“Absa tunaendelea kujizatiti kuunga mkono majukwaa yanayoimarisha uongozi unaozingatia maadili, kwa sababu tunaamini kuwa imani, uadilifu na uwajibikaji ni misingi muhimu ya ukuaji endelevu na ustawi wa pamoja,” alisema Laiser.

Kwa upande wa BEN-Africa, waandaaji wa mkutano huo waliipongeza Tanzania kwa kufanikisha tukio hilo na kusisitiza kuwa ushirikiano kati ya Absa Bank Tanzania, Chuo Kikuu cha Dar es Salaam na wadau wengine ulikuwa sehemu muhimu ya mafanikio hayo.

Rais wa BEN-Africa, Dk. Bryan Robinson, alisema mkutano huo umeendelea kuthibitisha umuhimu wa kuwa na majukwaa yanayowezesha watu wenye mitazamo tofauti kujadili kwa uwazi changamoto na fursa zinazohusiana na maadili katika maendeleo ya bara la Afrika.

Alisema ushiriki mkubwa kutoka nchi mbalimbali za Afrika na nje ya bara hilo unaonesha kuongezeka kwa umuhimu wa mitazamo ya Kiafrika katika mijadala ya kimataifa kuhusu maadili ya biashara.

Nao uongozi wa Shule Kuu ya Biashara ya Chuo Kikuu cha Dar es Salaam (UDBS), chini ya Mkuu wa Chuo hicho, Profesa Omari Khalifa Mbura, ulisisitiza umuhimu wa taasisi za elimu ya juu katika kuandaa viongozi wa baadaye wenye uwezo wa kukabiliana na changamoto tata za kimaadili zinazokabili jamii, biashara na serikali.

Mbali na mijadala rasmi, mkutano huo ulitoa fursa ya kujenga mitandao ya kitaaluma, ushirikiano na kubadilishana maarifa kati ya washiriki kutoka sekta na maeneo mbalimbali.

Baadhi ya washiriki walieleza umuhimu wa kuimarisha uhusiano kati ya tafiti za kitaaluma, sera za umma na utekelezaji wa shughuli za biashara ili kukuza uongozi wenye maadili katika Afrika.

Kwa ujumla, washiriki walikubaliana kuwa mijadala iliyoanzishwa katika mkutano huo haipaswi kuishia kwenye majadiliano pekee, bali inapaswa kutafsiriwa katika vitendo ndani ya taasisi, kampuni, serikali na jamii mbalimbali barani Afrika.

Mkutano wa Absa BEN-Africa 2026 ulihitimishwa kwa washiriki kujizatiti kuendeleza misingi ya uadilifu, uwajibikaji na uongozi unaozingatia maadili kama nguzo muhimu za maendeleo endelevu na ustawi wa muda mrefu wa Afrika.

Mkurugenzi Mtendaji wa Benki ya Absa Tanzania, Obedi Laiser akizungumza wakati wa mkutano wa siku mbili kuhusu Maadili ya Biashara wa Absa BEN-Africa 2026, uliodhaminwa na benki hiyo, ukihitimishwa katika Shule ya Biashara ya Chuo Kikuu cha Dar es Salaam (UDBS), jijini Dar es Salaam, leo. Mkutano huo uliandaliwa kwa ushirikiano kati ya Benki ya Absa, Mtandao wa BEN-Afrika na Chuo Kikuu cha Dar es Salaam ukiangazia nafasi ya misingi ya maadili katika kukuza biashara endelevu na maendeleo ya kiuchumi barani Afrika.

Mkuu wa Shule ya Biashara ya Chuo Kikuu cha Dar es Salaam (UDBS), Prof. Omari Mbura akizungumza wakati wa mkutano wa siku mbili kuhusu Maadili ya Biashara wa Absa BEN-Africa 2026, uliodhaminwa na Benki ya Absa, ukihitimishwa leo katika ukumbi wa mikutano wa UDBS, jijini Dar es Salaam. Mkutano huo uliandaliwa kwa ushirikiano kati ya Benki ya Absa, Mtandao wa BEN-Afrika na Chuo Kikuu cha Dar es Salaam ukiangazia nafasi ya misingi ya maadili katika kukuza biashara endelevu na maendeleo ya kiuchumi barani Afrika.

Mkurugenzi Mtendaji wa Benki ya Absa Tanzania, Obedi Laiser (waliokaa Katikati) akipiga picha ya pamoja na baadhi ya wafanyakazi wa benki wakati wa hitimisho la mkutano wa siku mbili kuhusu Maadili ya Biashara wa Absa BEN-Africa 2026, katika Shule ya Biashara ya Chuo Kikuu cha Dar es Salaam (UDBS), jijini Dar es Salaam, leo.

Read More